"Irregularidades" e "opacidade" nos contratos do Sergas, segundo o PSdeG

O Partido Socialista de Galicia (PSdeG) denunciou este xoves que o Tribunal Administrativo de Contratación Pública de Galicia (Tacgal) paralizou contratos do Sergas por valor de 45 millóns de euros entre maio de 2023 e maio de 2024 debido a "irregularidades, chanchulladas e opacidade". Segundo o portavoz da executiva do PSdeG, Xullo Torrado, o tribunal recibiu numerosas reclamacións de empresas e emitiu unhas 200 resolucións, das cales 63 foron favorables ás reclamacións por detectar irregularidades nos procedementos de contratación.

Do total de resolucións estimadas, 11 refírense especificamente a contratos do Sergas. Torrado explicou que estas paralizacións afectan á contratación de servizos esenciais como a limpeza de hospitais, o mantemento de equipos médicos e a dotación de material ortoprotésico. O portavoz socialista criticou que un órgano dependente da Xunta tivese que paralizar os seus propios contratos por irregularidades, cuestionando os motivos polos que o goberno galego insiste en realizar procesos opacos.

Ademais, o PSdeG anunciou que levará este asunto á comisión de investigación sobre os contratos da Xunta durante a pandemia, especialmente aqueles relacionados co Hospital Álvaro Cunqueiro e a empresa Eulen. Torrado advertiu de que se investigarán outros anos para esclarecer as causas destas irregularidades e os intereses detrás dos procedementos opacos de contratación.

Por último, Torrado aproveitou para criticar a "incapacidade" da Xunta na xestión dos fondos europeos, destacando que, segundo o Consello de Contas, Galicia deixou de executar máis do 50% dos fondos que recibiu en 2022. En relación ao Sergas, subliñou que o dato é aínda máis grave, pois a administración sanitaria non foi capaz de investir catro de cada cinco euros que lle chegaron a través dos fondos europeos.

XESTIÓN "CACIQUIL" DOS FONDOS EUROPEOS

A eurodeputada do Bloque Nacionalista Galego (BNG), Ana Miranda, criticou a "baixa" execución e a xestión "cortoplacista" e "caciquil" de fondos europeos por parte da Xunta tras o informe publicado o pasado mércores polo Consello de Contas. Nun comunicado remitido aos medios este xoves, a europarlamentaria nacionalista remarcou que a "baixa" execución de fondos pola Xunta e a "falta de transparencia" na súa xestión os seus asuntos "denunciados en Bruxelas desde moito tempo" polo Bloque.

Miranda avanzou o rexistro dunha pregunta dirixida á Comisión Europea na que traslada á institución comunitaria a forma de xestionar os fondos por parte do Goberno galego. "Como vai garantir a Comisión que a excesiva e interesada reprogramación non desvirtúe os obxectivos xerais do programa operativo Galicia 2021-2027 en favor de obxectivos curtopracistas e caciquís?", pregunta a eurodeputada. "Non podemos estar vendidos por un Goberno galego que reprograma fondos dunha maneira totalmente en contra dos intereses galegos e que ademais está a condicionar os fondos europeos para o seguinte período", aseverou.

CORGOS: "NON PERDEREMOS NIN UN EURO"

O conselleiro de Facenda, Miguel Corgos, remarca que os fondos europeos non executados en 2022 non se perderán e gastaranse en seguintes exercicios. En concreto, sobre as partidas do mecanismo de recuperación explica que se poden executar ata 2026: "Non perderemos nin un euro". Así se expresou nun audio remitido aos medios este xoves en relación co informe do Consello de Contas.

Sobre os fondos de recuperación, Corgos explica que supoñen a maior partida, o 36 %, e rexistran as baixas máis acusadas por "trabas" na súa programación por parte do Estado, que "afectou a todas as comunidades", "imposibilitando a xestión eficaz destes no propio exercicio 2022". Expón que os fondos React, tamén existentes por mor da crise da covid, xa se executaron ao 100 %. Engade sobre os fondos estruturais, cuxo período de programación terminou, que se executaron "máis do 100 %".

PRADO: "DICIR QUE A XUNTA NON É QUEN DE XESTIONAR OS FONDOS É UN CHISTE"

Asimesmo, a secretaria xeral do PPdeG, Paula Prado, defendeu a xestión do Goberno que dirixe Alfonso Rueda e concluíu que, dado o que "tarda" o Executivo estatal en trasladar os fondos europeos, "dicir que a Xunta non é capaz de xestionalos é un chiste". Prado defendeu que a Conta Xeral da comunidade evidencia que a execución dos orzamentos por parte do Goberno galego é "do cento por cento" e incidiu en que, aínda que "descoñece cales son as causas", é o Goberno central o que "en moitas ocasións traslada os fondos tarde, mal e a rastro".

A continuación, salientou que a Xunta tamén ten "os seus prazos de xestión". "Creo que dicir que a Xunta non é capaz de xestionar os fondos é un chiste, cando, realmente quen é incapaz de trasladar os fondos en tempo e forma para todos os proxectos estratéxicos de Galicia é o Goberno de España", esgrimiu. Como exemplo, indicou que cando se trasladan os fondos "en novembro ou decembro" pois "hai escasos días para a súa execución a piques de acabar o ano" e concluíu que habería que ver como se produciron e en que tempos os distintos procesos.

ABEL CABALLERO PIDE QUE ENVÍEN OS FONDOS SEN EXECUTAR A VIGO

Pola súa banda, o alcalde de Vigo, Abel Caballero, afeou á Xunta a súa inexecución de fondos da UE, que tachou de "catastrófica" e propuxo ao goberno galego que envíe os fondos á cidade, onde se executan esas axudas "marabillosamente". Nunhas declaracións remitidas aos medios, o rexedor constatou que o Consello de Contas "reprechou severamente" ao goberno autonómico que "non executou nin o 50 %" dos fondos europeos provintes do Goberno de España e subliñou que "é bo facer a comparación con Vigo". Nese sentido, Abel Caballero asegurou que o goberno que dirixe ten "comprometidos" o 90 % dos fondos europeos co gasto asegurado ata decembro.

"Imos chegar a decembro con practicamente o cento por cento. A Xunta o 50 % e o goberno de Vigo o cento por cento", proclamou. Tras apuntar que a Xunta é "incapaz" de executar eses recursos, o alcalde expuxo: "Que nolos envíen a Vigo, que comprometemos e executamos marabillosamente ben en favor dos cidadáns, e de paso, páganos unha parte da débeda da Xunta con Vigo, que é máis de 3.000 millóns". "Nós somos eficientes, facemos ramplas, ascensores, humanizacións, estadios de fútbol, facemos de todo e a Xunta non é capaz. Non quere mandalos a Vigo (eses fondos) porque os deixamos en evidencia, porque executamos a enorme velocidade e para ben dos cidadáns", sentenciou Caballero.

Antes as manifestacións do alcalde, o grupo municipal do PP saíu ao paso lembrando que a Xunta de goberno local de Vigo aprobou a devolución de axudas europeas por máis dun millón de euros, por proxectos que non se chegaron a executar (nin a iniciar). O portavoz do grupo 'popular', Miguel Martín, censurou o "relato falsario" de Abel Caballero, a quen advertiu de que "porque repita unha mentira mil veces non se vai a converter en verdade, por moi Caballero que sexa".