Piden que se amplíen as prazas de lingua portuguesa en 2016
A Asociación de Docentes de Portugués di que, a pesar de duplicarse o número de estudanes, a Xunta evita convocar novas prazas de docencia desta lingua.
Por Galicia Confidencial | A Coruña | 16/01/2016 | Actualizada ás 14:25
A Asociación de Docentes de Portugués (ADP) en Galicia, xunto a varios sindicatos, queren que se amplíen o número de prazas de lingua portuguesa nas oposicións que se convocan en 2016.
Así llelo fixeron saber ao Director Xeral da Educación, Manuel Corredoira, nunha xuntanza que tivo lugar este venres e no que lle lembraron que o alunado de lingua portuguesa aumentou considerabelmente, pasando de 861 o ano 2014 a 1841 en 2015.
O portugués, din, está de moda, pero esta tendencia non está acompañada pola provisión de postos de traballo. "E é que o número de prazas de especialistas de portugués é actualmente é cero", denuncian. "Estas prazas son cubertas por profesorado do centro que conte con horas libres que se poida encargar de lecionar esa disciplina, feito que non garante a continuidade os anos posteriores", critica a ADP.
Neste sentido, acusa aos populares de "desídia" por non poñer en marcha ningún tipo de iniciativa despois da aprobación por unanimidade no parlamento, hai case dous anos, da Lei para o aproveitamento da lingua portuguesa e vínculos coa lusofonia. Situación que contrasta coa realidade doutras comunidades do estado, como a Extremadura, onde se potencia o estudo desta lingua.
Esta petición non é nova. Hai cinco anos fíxose outra similar para a convocatoria de prazas de portugués como segunda lingua, pero tampouco daquela foi atendida pola Xunta.
En relación a isto, o sindicato CNT reclama a convocatória de oposicións como medida de garantir a estabilidade laboral e a calidade do ensino, así como o establecemento dunha lista de substitucións propia de persoal especialista.
