O “Gora Alka-ETA” motivo de identificación policial no Entroido galego

Ir disfrazado de marioneta nas festas do Entroido portando un cartel de “Gora Alka-ETA” pode ser motivo de intervención policial. Así aconteceu na madrugada do martes en Ourense, cando un mozo foi identificado xunto a outro tres compañeiros por un suposto delito de "apoloxía do terrorismo".

O identificado foi abordado por un grupo de axentes da Policía por portar esta pancarta que foi a mesma que portaban o monicreques do grupo Títeres desde Abajo nunha representación en Madrid e polo que están en prisión.

Segundo recolle o Observatorio para os Dereitos e Liberdades, Esculca por mor destes feitos, catro persoas foron identificadas na noite do luns ao martes en Ourense durante as festas de entroido.

Os feitos tiveron lugar na Praza Maior de Ourense, cando "entre sete e oito axentes", aproximáronse a un mozo disfrazado de monicreque e que portaba un cartel no que se podía ler 'Gora Alka-ETA'. O texto concreta que o mozo foi o primeiro en ser identificado e dous amigos restantes "limitáronse a interesarse polas razóns da identificación do amigo".

Ademais engade que o mozo pensou, nun primeiro momento, que se trataba de "unha broma de entroido" ata que -segundo recolle Esculca- un axente colleuno polo brazo e levouno até o furgón policial onde procederon á súa identificación. "Dous amigos do novo e outra persoa que se achegou para interesarse polas razóns da intervención policial, foron igualmente identificados", relataron.

Segundo recolle o observatorio, os policías comunicáronlles a súa intención de pór estes feitos en coñecemento da Audiencia Nacional a fin de que valore a posibilidade da comisión dun posible delito de "enaltecemento do terrorismo", aínda que non consta denuncia.