Por Galicia Confidencial | A Coruña | 15/02/2016 | Actualizada ás 08:00
EQUO é unha das catro forzas que colaborou en Alternativa Galega de Esquerdas, malia que non tiña ningún deputado no Parlamento. A lexislatura está a piques de rematar, como valoran o traballo de AGE? Sentiuse EQUO representado polos parlamentares de AGE?
Hai que valorar AGE no seu momento político. No seu tempo foi unha coalición que acadou un éxito electoral pero as regras teñen cambiado dende entón. AGE tentaba reunir ás forzas de esquerda nunha fronte común pero contaba coa cidadanía aínda como meros votantes e non como actores políticos de primeira liña. O que agora estamos a propoñer é un proceso dende abaixo onde a xente teña o protagonismo en proxectos participativos e os partidos coma o noso estean apoiando. Tamén temos que facer autocrítica e aprender de erros pasados. Nese sentido hai que ter en conta que AGE foi unha das nosas primeiras experiencias como partido e temos aprendido moito dende entón. En calquera caso, cómpre dicir que AGE foi moito menos participativa e aberta do que nos tivera gustado, tanto no seu proceso de formación como no seu funcionamento.
AGE sufriu até tres baixas no grupo parlamentar debido a diferencias internas en ANOVA e EU. Como valoran o sucedido e até que punto afectan a súa valoración do traballo deste catro anos?
Entendemos que estes son os riscos das coalicións «por arriba» e todas as formacións de AGE deberían reflexionar, tanto sobre os porqués desas baixas como sobre as distintas eivas que foron agromando en AGE para evitar no posible repetir erros no futuro. Non parece que se dera esa reflexión no similar proceso que houbo para as pasadas Xerais.
Unha confluencia non é unha coalición. Unha confluencia debera ser máis estable xa que nace do consenso programático a través de programas participativos, de primarias abertas e dunha xestión dos órganos de decisión e goberno onde todo o mundo está presente e pode participar. O traballo de AGE destes catro anos por suposto ten valor pero é un modelo que non serve. Agora temos que dar un paso máis e evolucionar cos tempos como se fixo en Marea Atlántica, Compostela Aberta ou Ourense en Común por mencionar algúns exemplos.
EQUO presentou o chamamento Onda Verde para xuntar a todos os que queren colaborar nunha hipotética confluencia na marea galega e teñen entre as súas prioridades cuestións como a ecoloxía política. Poderían explicar cales son as liñas ideolóxicas básicas que lles gustaría que defendera Onda Verde?
As liñas ideolóxicas serían as mesmas que as da Ecoloxía Política: entender que o entorno e as persoas teñen que ser respectadas como un todo. Se o entorno se degrada, todas acabaremos sufrindo as consecuencias. Por iso temos que mudar a unha economía social e solidaria e a relocalización da produción. Outro piar sería o paso dunha democracia representativa a unha democracia participativa. Non podemos ser só votantes para que durante 4 anos os partidos tomen as decisións que consideren oportunas. Hai que crear canles de participación e xeitos de captar as iniciativas das persoas. Evidentemente, a transparencia e a democracia teñen que comezar polo propio proceso de conformación dun suxeito político e dunha candidatura.
Loxicamente, do anterior dedúcese que EQUO aposta abertamente por reeditar unha coalición con forzas de esquerda para as autonómicas...
Gustaríanos crear un espazo autónomo e superador como o foron Marea Atlántica, Compostela Aberta ou Ourense en Común a nivel municipal, o cal é moito máis que unha coalición de forzas de esquerda. Non estamos a pensar en ningún caso nunha coalición de partidos. O protagonismo ten que deixar de residir exclusivamente nos partidos políticos.
Un dos axentes da última confluencia para as xerais, o Encontro Cidadán para unha Marea Galega, defende que nunha nova confluencia os partidos deberían dar un paso atrás e que as persoas que participen na candidatura o fagan a nivel individual e non en representación dos partidos. Cal é o seu punto de vista ao respecto?
Estamos de acordo, pero hai formas de artellar a participación dos partido dentro das candidaturas cidadás sen que estas perdan a súa esencia. Os partidos poden amosar o seu apoio a esas candidaturas e dar apoio técnico en determinadas cuestións. Todos xuntos, cidadanía e partidos, non só sumamos, multiplicamos a nosa forza. Non pretendemos competir, senón complementar.
EQUO participa en varias mareas de ámbito local, Compostela Aberta, Ourense en Común e mesmo teñen un concelleiro na Coruña,o concelleiro de Mobilidade Sostible, Daniel Díaz. Como valoran até o de agora o traballo das mareas que chegaron aos executivos locais
En xeral, valoramos positivamente o labor de goberno tanto da Marea Atlántica como de Compostela Aberta, así como o gran esforzo de oposición construtiva que está a facer Ourense en Común, por exemplo.
Somos conscientes de que a gran ilusión xerada polas Mareas fai que a xente sexa máis esixente e pida solucións en prazos curtos de tempo, pero tamén sabemos que as concelleiras e os concelleiros da Marea Atlántica, por seguir co exemplo da Coruña, están a poñer todo da súa parte para estar á altura das circunstancias. Non temos ningunha dúbida de que os resultados serán excelentes.
E en particular a labor do goberno da Marea Atlántica?
Aínda é cedo, pero no caso particular da Coruña puxéronse xa en marcha iniciativas de participación cidadá como A Porta Aberta, fundamentais para contar coa opinión da xente na acción de goberno, ademais de comezarse a aplicar por fin a lei da memoria histórica, da que pasados gobernos non quixeron saber nada. Podemos destacar tamén múltiples e importantes medidas no eido medioambiental, como o control da vexetación espontánea das rúas con medios ecolóxicos (evitando os nocivos glisofatos), a eliminación de múltiples puntos de verteduras no mar que incriblemente aínda existían na cidade e o comezo do que será un plan de rexeneración ambiental da ría, entre outras.
No tema da mobilidade sostible, e á espera dun ambicioso plan de reestruturación do transporte público na cidade que chegará proximamente, Daniel Díaz Grandío vén de presentar no pleno unha moción que foi aprobada por unanimidade para solicitar a ADIF e a Fomento o investimento preciso para as necesarias melloras na liña de ferrocarril entre A Coruña e Ferrol.
EQUO dispón de tres deputados dentro do grupo parlamentar de Podemos no Congreso dos Deputados. Cal é a súa postura respecto a un posíbel pacto de goberno co PSOE?
Hai un punto de vista común dentro do grupo parlamentario en canto ao posible goberno co PSOE. O documento proposto é un bo punto de partida, e como EQUO valoramos moi positivamente a inclusión de certos temas (cambio climático, transición enerxética), aínda que evidentemente habería que concretar máis os mecanismos e obxectivos. Porén, hai cuestións nas que dificilmente imos coincidir con Ciudadanos, por exemplo o plan de axuste do déficit que pide Europa ou a reforma laboral. Corresponde ao PSOE decidir cara que lado quere orientar o goberno.
En esencia, nós estaremos de acordo sempre que se intente formar un goberno de cambio que rompa coa dinámica de gobernos neoliberais que antepoñen os intereses dos sectores económicos financeiros ao ben común e a paliar a crecente desigualdade social. Necesitamos un goberno que vele por manter servizos públicos, que non os privatice, que loite decididamente contra a eliminación da corrupción, non que a defenda e oculte, que reformule as políticas medioambientais, educativas e laborais e que leve a cabo unha separación de poderes real entre o sistema xudicial e o goberno.
EQUO é identificado basicamente por ser a alternativa electoral máis "verde". Cren que o crecemento de EQUO relantizouse debido a que as preocupacións dos cidadáns afastáronse nestes últimos anos do ecoloxismo debido a crise económica?
Pode ser. Mais nós non somos só un partido ecoloxista. Temos que saber transmitir que non somos meros ambientalistas: Non nos preocupan só os montes e as baleas. Temos que ser quen de transmitir á xente que a crise que estamos a vivir non é só económica. É unha crise social, ecolóxica e de valores. Un modelo económico ecoloxista crearía máis postos de traballo xa que esas tarefas son máis intensivas en man de obra. Ao mesmo tempo pensamos que hai que pór en valor ese traballo «invisible» de coidados da familia e mesmo reducir o numero de horas traballadas como fan en países como Holanda (29 horas) ou Dinamarca (33). En EQUO estamos traballando por introducir todos eses temas na axenda política.
A maior polémica medioambiental no país nos últimos meses é a prórroga de ENCE. Que lle parece o argumento do presidente da Xunta para xustificala? Alberto Núñez Feijóo asegura que a el tamén lle estorba a pasteira na Ría, pero que non se poden prescindir deses postos de traballo...
Entendemos que os postos de traballo son importantes pero cremos que un entorno saudable e non degradado creará postos de traballo máis duradeiros. O que precisaría ENCE é un plan de relocalización dos seus traballadores no que o goberno autonómico debería ter moito que dicir. Penso que Feijóo está tirando polo camiño máis fácil.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.