Por Galicia Confidencial | Lisboa | 02/03/2016 | Actualizada ás 11:30
O tren de alta velocidade entre Lisboa e Vigo comeza xa a materializarse. Portugal sacou este mércores a concurso, de forma oficial, a electrificación do tramo ferroviario que conecta os municipios lusos de Nine e Viana do Castelo, próximo á fronteira con Galicia.
O contrato foi publicado no boletín oficial do Estado luso, no que se precisa que a adxudicación ten un prezo de referencia de 21,5 millóns de euros. O procedemento será supervisado por Infraestruturas de Portugal, e o prazo de execución estímase en 450 días.
A Liña do Miño conecta a cidade portuguesa do Porto e Vigo, e a súa electrificación -que permitirá aumentar a velocidade dos trens- é un dos grandes obxectivos históricos da rexión. unha segunda fase está previsto que se saque a concurso a electrificación do último tramo desta liña que aínda queda pendente en chan luso, desde Viana do Castelo até Valença do Minho, limítrofe con Galicia.
Un anuncio que foi moi ben acollido polo Eixo Atlántico que destaca que, deste xeito, o novo goberno socialista “está a cumprir a súa palabra”, xa que anunciou o pasado mes que, “en breve sacaría este concurso”. “Agora o que queda, é o tramo que vai de Viana a Galicia pero está pendente de coñecerse o acceso sur do TAV en Vigo”, apuntaron fontes consultadas.
A licitación desta electrificación estaba inicialmente anunciada para o mes de setembro, tal e como figuraba nun dos acordos alcanzados na XXVIII cume hispano-lusa, celebrada en xuño do ano pasado na localidade pontevedresa de Baiona. Con todo, as eleccións e o cambio de Goberno rexistrado en Portugal atrasaron o concurso, que xa foi anunciado o pasado 17 de febreiro polo ministro de Plan e Infraestruturas, Pedro Marques, durante a súa participación na asemblea do Eixo Atlántico.
Vigo e O Porto están conectados desde 2014 cun tren directo que completa o traxecto en dúas horas e cuarto, e coa mellora da Liña do Miño a viaxe reducirase até os 90 minutos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.