Toda a oposición galega en contra do acordo da UE sobre os refuxiados sirios
Piden unha sesión urxente da Comisión Permanente para Asuntos Europeos para abordar esta situación. O Concello de Pontevedra anuncia que retirará a bandeira europea do edificio municipal.
Por Galicia Confidencial | Compostela | 15/03/2016 | Actualizada ás 10:00
Todos unidos en contra do acordo da UE con Turquia para que acolla a todos os refuxiados que cheguen a territorio europeo. Os Grupo Parlamentario dos Socialistas de Galicia, o Grupo Parlamentario do Bloque Nacionalista Galego, o Grupo Parlamentario da Alternativa Galega de Esquerda e o Grupo Parlamentario Mixto, onde se atopa Cerna, solicitan unha reunión urxente e monográfica da Comisión Permanente non Lexislativa para Asuntos Europeos, para abordar esta cuestión.
Todos os grupos da oposición en Galicia queren que o PP se pronuncie sobre o acordado e as intencións do Goberno Español e da Xunta ao respecto do rexeitamento e expulsión masiva das persoas refuxiadas que foxen das guerras de Oriente Próximo. Sobre esta cuestión, o portavoz parlamentario do PPdeG, Pedro Puy, suliñou este luns que os populares están coa “legalidade internacional” que emana do acordo da UE.
Por outra banda, o Concello de Pontevedra procederá este martes a retirar a bandeira da Unión Europa da Casa Consistorial como "sinal da protesta" ante a política comunitaria sobre os refuxiados.
Trátase dunha iniciativa que o BNG está a solicitar aos gobernos municipais das cidades galegas para protestar contra un acordo que, din, vai contra a legalidade internacional e os dereitos humanos, representa unhas políticas "inhumanas e lesivas" e viola os dereitos humanos fundamentais.
Ante esta decisión, desde o grupo municipal do PSdeG-PSOE en Pontevedra lamentaron que o alcalde, Miguel Anxo Fernández Lores, estea a protagonizar unha "clara deriva" cara a un nacionalismo "rancio e eurófobo". "O que fará Lores é tan estúpido como arriar a bandeira galega cada vez que non esteamos de acordo con algunha medida posta en marcha pola Xunta", sinalou o portavoz socialista, Agustín Fernández.
