Revolta simbólica dalgúns concellos contra a UE tras o peche de fronteiras
A Coruña e Ferrol tamén baixarán a bandeira europea dos consistorios municipais sumándose, deste xeito, a Pontevedra.
Por Galicia Confidencial | A Coruña | 16/03/2016 | Actualizada ás 09:00
Os concellos da Coruña e de Ferrol anunciaron este martes a retirada parcial da bandeira da Unión Europea (UE) que loce nos balcóns dos consistorios municipais. Unha decisión que tamén adoptou o Concello de Pontevedra e que é unha medida de protesta contra o acordo da troika comunitaria con Turquia para a devolución dos refuxiados sirios e o peche de fronteiras.
Con esta medida, o Consistorio coruñés mostra o seu rexeitamento ao "peche das fronteiras europeas aos solicitantes de asilo político procedentes de Asia e África" tras manifestar previamente a súa vontade de unirse ás "cidades refuxio". Por este motivo, a bandeira da UE do palacio de María Pita ondea xa na parte máis baixa do mastro, mentres a galega e a española continúan nas súas posicións habituais.
Tamén o Concello de Ferrol unirase, ao longo do día deste mércores, ás reivindicacións pola crise de refuxiados, co simbólico arriado da bandeira da Unión Europea, despregada na fachada do consistorio da Praza de Armas.
O Goberno da cidade, formado por Ferrol en Común e PSOE, anunciou que se integrará tamén mañá na concentración que está prevista ás 20 horas diante do edificio administrativo da Xunta de Galicia, e onde estará presente, entre outros moitos colectivos, o comité de empresa de Navantia Ferrol.
Como noutros puntos de Galicia, o BNG tamén solicitou non só que se baixe, senón que se retire a bandeira comunitaria "en sinal de denuncia pola barbarie humanitaria que se está cometendo contra as persoas refuxiadas".
