Valentín García: "O problema do galego non está nas aulas"
"Ninguén fala a lingua que lle manda un decreto", declara o secretario xeral da Lingua
- Román Rodríguez rexeita falar sobre o galego centrándose no ensino e di querer fuxir de "posicións maximalistas"
- A Xunta di que Galicia xa "validou" nas urnas a súa política lingüística: "Non lle entramos ao trapo ao BNG"
Por Europa Press / Redacción | Santiago de Compostela | 13/02/2025 | Actualizada ás 18:51
O secretario xeral da Lingua, Valentín García, incidiu este xoves na relevancia que ten a socialización dos escolares na adquisición da lingua, e comprometeu o traballo da Xunta na creación de espazos de socialización en galego nos centros educativos, dado que, desde o seu punto de vista, "o problema do galego non está dentro das aulas".
Nunha comparecencia na Comisión 4ª para responder a unha pregunta formulada polo Grupo Socialista, Valentín García falou do proceso para a renovación do Plan Xeral de Normalización Lingüística e sobre as medidas a implantar, recoñecendo que "non é fácil incidir nun cambio social nin xerar cambios nos hábitos lingüísticos". "Ninguén fala a lingua que lle manda un decreto", resumiu.
Así, e aínda que lembrou que renovar o Plan Xeral é "o primeiro compromiso" de todo o proceso aberto, apuntou que, "en paralelo", a Xunta traballa noutras medidas, especialmente dedicadas aos máis novos, como é "empezar a concibir os centros educativos como espazos de socialización en lingua galega" e "encher patios, corredores e espazos de lecer con actividades en galego".
"É certo que, á marxe de todo o que podamos mellorar o decreto, o problema do galego non está no galego dentro das aulas, está nos centros como espazo de socialización", apuntou o secretario xeral, que considerou que se un neno gallegoparlante volve do colexio falado castelán, é por "a súa socialización con outros nenos que falan castelán", sobre todo en áreas urbanas, e non pola lingua empregada na aula. "Non veñen falando en castelán porque o mestre lles mande falar castelán, é porque entran en relación con outros nenos que son castellanoparlamentes", resumiu.
Do mesmo xeito, referiuse a a enquisa do IGE e á encargada pola Xunta a Sondaxe, que defendeu alegando que "non é a mesma enquisa", se non que a segunda se centra en "unha franxa etaria moi concreta", a de poboación nova en idade escolar, onde o IGE sinalaba "un problema concreto de uso". "Hai unha percepción de uso do galego entre os mozos, é o dato que máis chama a atención e sobre o que máis urxentemente temos que actuar", apostilou Valentín García.
Por iso, a Xunta "puxo a lupa sobre eses datos", buscando información só de "familias con fillos en idade de estar escolarizados", co fin de "obter datos, entendemos que enriquecedores, sobre o problema, porque nunca negamos que houbese un problema", engadiu.
