Portugal quere facer un polo turístico do Camiño de Santiago
O Ministro de Cultura luso comprometese a revitalizar o Camiño e tamén dá o seu apoio á súa candidatura a Patrimonio da Humanidade, tal e como reclama o Eixo Atlántico.
Por Galicia Confidencial | Lisboa | 30/03/2016 | Actualizada ás 11:00
Portugal quere liderar a recuperación e promoción do Camiño Portugués de Santiago, tanto na súa recuperación, como na candidatura do Camiño para ser declarada Patrimonio da Humanidade pola UNESCO no horizonte de 2021, próximo ano santo.
Así o declarou o ministro de Cultura luso, João Soares, nun encontro que mantivo en Lisboa co presidente e o Secretario Xeral do Eixo Atlántico, Ricardo Rio e Xoan Vázquez Mao. De feito, o dirixente portugués amosouse “entusiasta” do Camiño de Santiago e á relación con Galicia.
Por iso, comprometeuse a organizar unha reunión con outros departamentos do Goberno de Portugal, especialmente os de Economía e Turismo para analizar os próximos pasos a dar. De feito, este mércores, o Secretario Xeral da entidade transfronteiriza e a asesora do Ministro acordarán os pormenores desta reunión para que se celebre canto antes.
Igualmente Soares manifestou aos dirixentes do Eixo Atlántico que enviará nos próximos días unha carta oficial á entidade na que testemuñará o seu apoio, e o do seu departamento, a estes proxectos.
Ricardo Rio, pola súa banda, manifestou a súa satisfacción pola adhesión do Goberno portugués á proposta do Eixo Atlántico que este órgano considera “crucial non só para o turismo, senón para a economía global da rexión Norte e de todo Portugal”. Pola súa banda, o Secretario Xeral do Eixo Atlántico, lembrou que o novo goberno portugués “desbloqueou en 4 meses” dúas importantes cuestións para a eurorrexión como son as infraestruturas e o Camiño Portugués.
