Ferrol envórcase na axuda a Siria
Concello, bombeiros e Protección Civil cooperan na recollida solidaria de doazóns aos refuxiados.
Por Galicia Confidencial | Ferrol | 31/03/2016 | Actualizada ás 10:00
O Concello de Ferrol, os bombeiros do parque da Gándara e os voluntarios da Agrupación Local de Protección Civil, iniciaron unha recollida de doazóns solidarias para axudar aos refuxiados sirios nas instalacións do antigo acuartelamento de terra no Sánchez Aguilera, en Catabois.
Ata agora recolleuse, especialmente, roupa, aínda que os bombeiros insisten en que o que máis se precisa son produtos de hixiene (cepillos e pasta dos dentes, champús antipiollos, compresas, artigos para o afeitado, xel, toallas,..) alimentos infantís, así como cadernos e lapis de cores, ademais de outros produtos como poden ser cremas calmantes, apósitos, alcol, auga osixenada, vendas e gasas, muletas ou bastóns.
Neste días festivos, algúns veciños fixeron directamente as súas doazóns no parque no parque de bombeiros da Gándara pero desde o martes 29, centralizase no Sánchez Aguilera. Esta é unha iniciativa solidaria dos bombeiros da cidade naval, que conta co respaldo do Concello de Ferrol e coa colaboración dos voluntarios da agrupación local de Protección Civil.
