Produtos galegos “feitos nas mariñas”

A Reserva da Biosfera Mariñas Coruñesas e Terras do Mandeo lanzará unha marca de calidade que distinga aos produtos agroalimentarios autóctonos, unha iniciativa que contará coa colaboración da Deputación da Coruña.

Trátase dunha idea encamiñada á promoción unificada de produtos dos diversos sectores alimentarios implantados na zona, como o agrario, o pesqueiro e marisqueiro ou o vinícola "baixo o paraugas dunha marca de calidade reconocible para o consumidor".

Este proxecto abarcaría aos dezasete concellos deste espazo, que son Abegondo, Aranga, Arteixo, Bergondo, Betanzos, Cambre, Carral, Coirós, Culleredo, Curtis, Miño, Irixoa, Oleiros, Oza-Cesuras, Paderne, Sada e Sobrado.

Actualmente, xa hai máis de sesenta produtores agroalimentarios locais que integran xa a iniciativa e aos que poderían incorporarse novos proxectos emprendedores das máis de catrocentas persoas que participaron nas accións formativas que, neste ámbito, se desenvolveron nos últimos anos.

O presidente da institución provincial, Valentín González Formoso, comprometeu este luns o seu apoio, que podería enmarcarse nos programas para apoiar iniciativas emprendedoras cos que contará o Plan de Emprego do organismo provincial.

"Trátase do único espazo Reserva da Biosfera existente na nosa provincia, o que axudará a pór en valor os produtos locais, apoiar o desenvolvemento do ámbito rural e xerar emprego", suliñou.

A iniciativa foi presentada durante a reunión que o presidente provincial mantivo cos representantes do órgano xestor da Reserva da Biosfera, o alcalde de Abegondo e presidente do Consello de Dirección, José Antonio Santiso, o alcalde de Paderne, César Longo, e o xestor da entidade, Jorge Branco.