Fútbol para chamar a atención sobre os prexuízos contra o pobo xitano
Membros do colectivo xitano alertan sobre a súa imaxe estereotipada que sobre eles hai nos medios de comunicación.
Por Galicia Confidencial | Lugo | 08/04/2016 | Actualizada ás 18:54
Membros da Corporación Municipal de Lugo asistiron este venres, no campo de fútbol Luis López Gorgoso, á lectura dun manifesto e á solta de globos simbólica para conmemorar o Día Internacional do Pobo Xitano
A Fundación Secretariado Gitano de Lugo e a Asociación de Promoción e Integración Gitana de Lugo commemoraron este venres o Día Internacional do Pobo Xitano no campo de fútbol Luis López Gorgoso.
Alí, e coa presenza de me embros da Corporación Municipal, leron un manifesto e xogaron un partido de fútbol para alertar sobre a imaxe estereotipada que algúns medios trasladan deles. Así, Antonio Cortiñas Montoya, membro da Fundación Secretariado Gitano, leu o manifesto que baixo o lema 'Por un trato digno ao pobo xitano nos medios de comunicación', criticou algúns programas de televisión no que se “caricaturiza” aos xitanos co “conseguinte dano para a imaxe social do pobo xitano”.
Tras a lectura, os asistentes fixeron unha solta de globos simbólica coas cores da bandeira xitana, coa que se deu inicio a un partido de fútbol amistoso.
