Pedro Sánchez insiste en que o candidato do PSdeG non será nomeado a dedo
Evita falar de opcións para substituír a José Ramón Besteiro, entre elas, a presidenta da Deputación de Pontevedra, Carmela Silva.
Por Galicia Confidencial | Madrid | 13/04/2016 | Actualizada ás 16:30
O secretario xeral do PSOE, Pedro Sánchez, evitou pronunciarse sobre os posibles substitutos de José Ramón Besteiro para ser o vindeiro secretario xeral do PSdeG candidatos á Xunta e garantiu que o candidato socialista á presidencia da Xunta será elixido en primarias polos militantes do PSdeG.
Nunha entrevista en Telecinco, Sánchez referiuse á recente dimisión de Besteiro como secretario xeral dos socialistas galegos, tras ser investigado por dez delitos en dúas causas xudiciais. "Respondemos adecuadamente ao caso", dixo, aínda que non quixo opinar sobre a factura electoral que pode pasar aos socialistas ese asunto.
Preguntado por se ten pensado algún candidato para suceder a Besteiro e polas opcións de Carmela Silva, o líder do PSOE evitou pronunciarse: "Serán as primarias e, por tanto, o candidato que elixan os militantes", resolveu.
