Máis de 16.000 persoas piden que non se sacrifiquen 20 vacas en Chantada
Estas foron as sinaturas acadas nunha petición que leva pouco máis de 12 horas en change.org e que reclama que as reses atopadas en mal estado nunha explotación non sexan sacrificadas.
Por Galicia Confidencial | Lugo | 22/04/2016 | Actualizada ás 11:27
Unha campaña na rede formulada polo Santuario Gaia, un refuxio para aniomais de granxa, acadou xa máis de 16.000 sinaturas na rede para evitar que as 20 vacas que foron atopadas nunha explotación semiabandonada de Chantada non sexan sacrificadas. O seu obxectivo é chegar aos 25.000 apoios.
Nesta mesma explotación, o Seprona e os técnicos da Xunta atoparon os cadáveres e restos óseos doutras corenta reses, como consecuencia da falta de atención por parte do seu propietario, unha circunstancia que xa está a ser investigada polo xulgado.
A mobilización para salvar do sacrificio ás vacas que foron atopadas con vida, aínda que moitas nun estado esfameado e con feridas no corpo, tamén implicou "a varios santuarios de animais", como o Santuario Wings of Herat, O Fogar ProVegan ou Mino Valley Farm Sanctuary, segundo informou a plataforma Change.org, onde o Santuario Gaia formulou a súa petición.
Varios voluntarios desa organización desprazáronse este venres a diversos matadoiros da provincia para evitar que os animais sexan sacrificados.
