Compensacións pola veda do xurelo e o polbo para 2.000 mariñeiros e 400 embarcacións
Os armadores que tamén sexan parte da tripulación poderán cobrar ambas as modalidades de axudas.
Por Europa Press / Redacción | SANTIAGO DE COMPOSTELA | 19/05/2025 | Actualizada ás 18:18
As axudas da Xunta para a compensación económica da veda do xurelo e do polbo, por case 7 millóns de euros, alcanzarán os 2.038 mariñeiros e 412 embarcacións beneficiarias en total. Así o avanzou o conselleiro de Presidencia, Xustiza e Deportes, ao finalizar a reunión do Goberno autonómico que avaliou as ordes destas subvencións que serán publicadas no Diario Oficial de Galicia (DOG). O prazo de solicitude será dun mes a partir desta publicación.
No caso da veda do xurelo, levouse a cabo durante dous espazos temporais de 30 días consecutivos, a elixir os meses de xaneiro, febreiro e decembro de 2024. Haberá 65 buques que percibirán de media 22.687 euros, e 658 mariñeiros que cobrarán 2.200. Para a parada do polbo, que obrigatoriamente se desenvolveu do 1 ao 30 de abril de 2025, serán 345 embarcacións que recibirán 4.514 euros de media, e 1.380 tripulantes, que cobrarán 2.762 euros. Unha das novidades é que, en ambas as ordes de axudas, os armadores que sexan tamén tripulación poderán beneficiarse das dúas compensacións.
