A patronal ourensá acusa aos sindicatos de romper a mediación do convenio de alimentación

A negociación do Convenio Colectivo do Comercio de Alimentación de Ourense entrou nun novo punto morto logo de que as centrais sindicais USO, CIG, UXT e CCOO abandonasen o proceso de mediación, segundo denunciou este venres a representación empresarial do sector. A patronal censurou a "falta de vontade negociadora" das organizacións sindicais, tanto durante a mediación como ao longo de todo o proceso previo, que se estende dende hai meses sen avances significativos.

Nun comunicado remitido aos medios, os empresarios indicaron que se celebraron dúas xuntanzas de mediación, pero lamentan que a postura das centrais "volveu ser a mesma", sen presentar contrapropostas ou achegamentos. “A parte empresarial quixo avanzar, presentando propostas e tentando chegar a un acordo, a parte social non presentou ningunha proposta de achegamento, dando por terminada a mediación”, sinalan.

A patronal asegura que sobre a mesa houbo unha oferta mellorada que atendía a parte das reivindicacións laborais formuladas polos traballadores. En concreto, propoñíase un incremento salarial de 1.902 euros en 2025, o que representaría unha suba do 11,76 %, e de 3.662 euros no conxunto dos catro anos de vixencia do convenio, cun aumento total do 22,6 %. Non obstante, segundo fontes empresariais, a parte sindical cualificou esta oferta de "insultante" e optou por abandonar a mesa.

Xunto ás melloras salariais, os representantes empresariais afirman ter incluído tres fins de semana de calidade, medida que equipararía o convenio ourensán co que máis fins de semana de descanso contempla en Galicia. Ademais, a proposta incluía un día máis de vacacións, plus de nocturnidade, axuda escolar e unha cláusula de revisión salarial anual para manter o poder adquisitivo do persoal.

A pesar do bloqueo, a parte empresarial insistiu na súa disposición para continuar negociando e pediu ás centrais sindicais "responsabilidade e vontade de acordo" para desbloquear unha situación que afecta a centos de traballadores e traballadoras do sector na provincia. “Non renunciamos a lograr un bo acordo para todas as partes. Apelamos á responsabilidade e ao diálogo”, conclúe o comunicado.

O convenio do comercio de alimentación é clave para regular as condicións laborais de boa parte do persoal empregado en supermercados, tendas de alimentación e distribución alimentaria en Ourense. O sector mantense en vixilancia á espera de que se poida retomar a negociación, mentres o conflito ameaza con cronificarse ante a distancia entre as partes. Polo momento, non hai novas datas previstas para retomar o diálogo.