Gases lacrimóxenos e cortes de suministros de comida, auga e leite para desmantelar Idomeni

A Policía grega comezou onte a manobra de desmantelamento do campo de refuxiadas de Idomeni, cunha estratexia preocupante: o corte de todos os suministros de comida, auga e leite que estaban entrando ao campo a través do voluntariado internacional. Ao tempo, e despois de que as forzas de seguridade tomaran a zona 'manu militari' están a expulsar da zona ás máis de 100 voluntarios. É a denuncia que fai Stop Desafiuzamentos, unha de cuxos integrantes, María Díaz, atópase traballando neste campo.

Do outro lado do aramado en Idomeni, soldados macedonios vixían a fronteira e ameazan aos reporteiros gráficos | Fonte: Miguel Núñez.

“Están impedindo que se supervise unha preocupante operación disuasoria, onde se volve prioritario restaurar as comunicacións ferroviarias con Macedonia - que atravesan o campo -, antes que garantir unha mínima seguridade para as refuxiadas que xa están a vivir condicións infrahumanas”, denuncia este colectivo.

Segundo as fontes gobernativas para a prensa exterior, estas persoas estarían a ser redirixidas a campos militarizados, polo que lles resulta incomprensible “as reticencias do voluntariado internacional”. Sen embargo, apunta que, “amais de teren intervido sobre o campo con gases lacrimóxenos e outras técnicas bélicas de disuasión”, téñense constatado por parte do voluntariado condicións de vida “deplorables e un estado de perda de liberdade masiva” para as refuxiadas nos campos. “Neles prohíbese expresamente o acceso ao voluntariado internacional, o que é todo unha declaración de principios da vontade de incumprir a lexislación humanitaria básica”, engade.

Ademais, apunta que as familias que non aceptan o seu traslado forzoso a campos militarizados están buscando novos realoxos ao longo do territorio grego, rompéndose as redes e o asentamento previo existentes en Idomeni. “A situación é de soidade e desesperación absoluta. O goberno grego non está a facilitar información clara nin sobre o dereito ao asilo nin tampouco sobre o futuro inmediato destas familias, ás que mesmo están a dividir para o seu transporte non se sabe ben onde”, denuncia.

Dende Stop Desafiuzamentos amosan o seu respaldo total á compañeira María Díaz, destacada en Policastro onda outras voluntarias galegas, “porque a resistencia contra a barbarie, as políticas inhumanas e a loita polo dereito a unha vida digna dáse por riba das fronteiras”.

Unha nai sostén o seu fillo tras unha tormenta que arrasou o campo de refuxiados de Idomeni | Fonte: Miguel Núñez.

O sorriso desta nena refuxiada en Idomeni desafía a tristura do muro de arame que a priva dunha vida segura en Europa | Fonte: Miguel Núñez.