A Xunta quere plantar un millón de castiñeiros

A Xunta quere que o castiñeiro, árbore autóctona galega e cunha gran importancia na gastonomía do país ata a chegada da pataca, volva a ocupar o posto que lle corresponde nos montes galegos. Por iso, destinará 2,5 millóns de euros para que os galegos poidan plantar un millón de árbores desta especie.

Foi o anuncio que fixo este xoves o presidente da Xunta, Alberto Núñez Feijóo, como unha das medidas para a diversificación do mundo rural. As subvencións ás plantacións de castiñeiros partirán dos cartos do superávit e teñen coma fin que se repoboen 1.000 hectáreas de terreo con esta especie.

Sen embargo, a Xunta delimita estas axudas a zonas concretas. Así, toda a provincia de Ourense e case toda a de Lugo (agás a Mariña) poderán acollerse ás subvencións. Na de Coruña só as zonas da Terra de Melide e de Boimorto e en Pontevedra os concellos do Deza, Tabeirós-Terra de Montes e Cuntis, Cotobade, A Lama e Campolameiro.

“E unha árbore autóctona que está moi identificada con Galicia”, dixo Feijóo ao defender esta media. Ademais, e a diferencia de anos anteriores, non haberá superficie mínima para solicitar axuda. Tamén haberá menos esixencias nos requisitos e se anularán as prohibicións de plantar castiñeiros en fincas en pendente.

Por outra banda, a Xunta destinará 4,2 millóns de euros para completar a parcelaria e para iniciar novas fases. En total, o obxectivo é chegar a 44.000 hectáreas parceladas que afectan a case 30.000 familias.

Na rolda de prensa posterior ao Consello da Xunta, Feijóo tamén anunciou axudas por valor de 3 millóns de euros para os gandeiros que teñen préstamos con dificultades para axudalos a refinanciar créditos, execucións hipotecarias ou débedas con produtores.