O Parlamento Europeo investigará o accidente de tren

A comisión de peticións do Parlamento Europeo decidiu iniciar o exame das dúas denuncias presentadas pola plataforma de vítimas do accidente do Alvia, ao considerar que "cumpren os requisitos de admisión a trámite".

 

A noticia da admisión das dúas denuncias, unha con que os afectados polo sinistro ferroviario acusan ao Estado español de incumprimento da normativa de seguridade ferroviaria, e a segunda sobre un posible delito de publicidade enganosa, chegou ao colectivo a través dunha carta remitida pola presidenta da devandita comisión, Cecilia Wikström.

 

A misiva, á que tivo acceso Europa Press, sinala que o asunto "incide no ámbito de actividades da Unión Europea, de conformidade co Regulamento do Parlamento Europeo". "A seguridade ferroviaria está regulada pola UE na Directiva 2004/49/CE (modificada pola Directiva 2008/57/CE, a Directiva 2008/110/CE e a Directiva 2009/149/CE)", engade.

 

Por iso, o ente da eurocámara informa as vítimas de que "solicitou un informe sobre este accidente á Axencia Ferroviaria Europea", posto que "entre as súas competencias está facer recomendacións ás especificacións técnicas da Comisión Europea sobre a interoperabilidade (ETT) e a seguridade".

 

Así mesmo, "e baseándose nas conclusións dese informe", a comisión de peticións reclama tamén que a Axencia Ferroviaria "propoña accións para mellorar a seguridade ferroviaria en Europa", segundo explica na carta.

 

Así, conclúe que "proseguirá o exame" das peticións da Plataforma Víctimas Alvia 04155 "tan pronto como dispoña da información necesaria".

 

Viaxe en novembro

En novembro, integrantes da Plataforma Vítimas Alvia 04155, que agrupa á maioría dos afectados polo accidente do tren en Santiago que deixou 81 mortos e 144 feridos en xullo de 2013, viaxaron da man do BNG a Bruxelas para reunirse con responsables de transporte da Comisión e do Parlamento europeos.

 

En abril, a Axencia Ferroviaria Europea comunicoulles que rematara o seu exame do informe da CIAF (comisión de investigación de accidentes ferroviarios) ao respecto das causas do descarrilamento.

 

Despois de varias negativas, o pasado 31 de maio, a Comisión afirmou estar a estudar a posible publicación dese informe, tras pechar o expediente de infracción aberto a España pola aplicación das normas de seguridade ferroviarias da UE. "O proceso de infracción pechouse", segundo confirmou o voceiro de Transportes do Executivo comunitario, Jakub Adamowicz.