A baixada das temperaturas e as choivas desta fin de semana poden impulsar o avance do mildiu

A Deputación de Pontevedra, a través do novo aviso fitosanitario do persoal técnico da Estación Fitopatolóxica do Areeiro, alertou de que a baixada das temperaturas e as choivas desta fin de semana poden impulsar o desenvolvemento de novas infeccións de mildiu e oídio, así como "reactivar as que se atopan controladas", por iso, aconsellou vixiar este posible avance.

Ademais, aconsellou manter a vixilancia, "pois un ataque mal controlado implicaría tamén a rotura da pel dos grans e a entrada de botrite". No relativo ao black rot, a previsión é máis positiva e non existe presenza da enfermidade, polo que neste período da campaña xa non debería causar danos, segundo explicou a institución provincial nunha nota de prensa.

Por outra banda, no caso das polillas do acio, indicou que as capturas de machos de Lobesia botrana "seguen sendo moi escasas" e destacou que "é máis notable a incidencia de acariosis, que nunha fase máis inicial do ataque os seus síntomas poden ser confundidos cos de trips ou con algunhas virosis".

En canto aos cicadelidos, lembrou que é o período para aplicar o segundo tratamento obrigatorio dentro do plan de control e erradicación da flavescencia dourada. Tamén indicou que é "imprescindible" destruír, canto antes, todas as plantas confirmadas como positivas e sintomáticas.

Con todo, o aviso fitosanitario inclúe tamén observacións sobre a nogueira, xa que se capturaron os primeiros adultos de mosca da casca, rhagoletis completa, "que pode levar á perda da colleita". Para o control desta praga, ademais das trampas de feromonas de seguimento, "é aconsellable eliminar as noces caídas e estender no terreo baixo a copa unha lona tupida que impida que as larvas se enterren no chan para pasar o inverno".

Follas de plantas de pataca afectadas polo mildiu | Fonte: Commons - Arquivo