Badaladas para poñer fin aos suicidios
O Movemento Galego de Saúde Mental convoca concentracións en toda Galicia para pedir un plan de prevención contra o suicidio tras rexistrarse case 400 mortes en 2014.
Por Galicia Confidencial | Vigo | 30/06/2016 | Actualizada ás 09:10
Badaladas contra os suicidios. Esa é a proposta do Movemento Galego de Saúde Mental (MGSM) que convoca distintas concentracións este xoves nas cidades galegas para reclamar un plan de prevención contra o suicidio.
Con esta iniciativa quérese lembrar que cada día se suicida polo menos unha persoa na comunidade autónoma —rexistráronse 394 mortes deste tipo no 2014—, razón pola que o MGSM lle esixen á Consellaría de Sanidade a elaboración dun plan preventivo. Estas concentracións están apoiadas por SOS Sanidade Pública, CIG e CCOO, entre outros colectivos.
As recomendación da OMS afirman que o suicidio pode previrse eficazmente e, por iso, apostan polo obxectivo de reducir en cada país nun 10% para o ano 2020 o número de mortes por esta causa. Imperativamente chama ós Gobernos a liderar e a desenvolver Plans de Prevención do Suicidio.
Por iso, o Movemento Galego da Saúde Mental, respostando a ese mandato, iniciou o pasado 3 de maio a campaña Badaladas pola prevención do suicidio, coa finalidade de sensibilizar á sociedade fronte a esta cuestión, e para reclamar o cumprimento das obrigas que os gobernantes teñen coa protección da saúde e da vida da poboación.
“Esiximos que con urxencia se elabore ese plan, por unha comisión técnica capaz e crible, cun carácter multisectorial, articulado co necesario Plan Galego de Saúde Mental, e dotado suficientemente”, apuntan desde a CIG.
Segundo CCOO, o plan galego ha ter carácter multisectorial e dotarase de suficientes recursos para afrontar o problema e artellalo no plan de saúde mental de Galicia. Todas esta entidades tamén coinciden á hora de pedir a constitución dun comité técnico para a elaboración do plan e a creación de comisións clínico-asistenciais en cada xerencia sanitaria do país.
Concentracións (todas ás 20 h):
A Coruña: diante do Obelisco
Ferrol: praza de Armas
Lugo: praza Maior (diante do Concello)
Ourense: xardíns do Padre Feijóo
Ribeira: praza do Concello
Cangas do Morrazo: praza do Concello
Pontevedra: praza da Peregrina
Vigo: praza da Constitución
