Por E.P. | Santiago de Compostela | 02/07/2016 | Actualizada ás 14:53
A presidenta da xestora do PSdeG, Pilar Cancela, admitiu este sábado que o actual é "o tempo de Rajoy" para intentar formar Goberno, tras os resultados electorais do 26J, aínda que recordou que se o líder popular "fracasa" neste proceso, o PSOE asumirá a súa "responsabilidade" como segunda forza máis votada.Así o dixo en declaracións aos medios na localidade coruñesa de Neda antes de participar nunha reunión da executiva provincial, onde chamou a "respectar os tempos" en consonancia cos resultados electorais.
Neste sentido, apuntou que Mariano Rajoy "dixo agora que vai asumir a súa responsabilidade", polo que instou a "deixalo que faga o seu traballo" intentando formar unha alternativa de Goberno con "maioría parlamentaria". "Nós respectamos o que votou a cidadanía, é, polo tanto, o tempo de Mariano Rajoy", dixo Cancela, que sinalou que "cos que ten que empezar a falar é cos que teñen certa afinidade ideolóxica".
Se Rajoy "non é capaz de facelo", a presidenta da xestora dos socialistas galegos garantiu que "aí estará o PSOE", como "segundo máis votado", para "asumir a súa responsabilidade". "Pero agora tócalle a el", sentenciou.
Sobre as opinións dalgúns dirixentes socialistas que apostan pola abstención do partido para facilitar a investidura de Mariano Rajoy, Cancela dixo que son "respectables" aínda que "extemporáneas". Así, recordou que a liña do partido a marca a Executiva Federal e o Comité Federal que se reunirá o próximo sábado para "debater todas estas cousas".
"Polo tanto, todo o que se diga antes, e algo que non diga o secretario xeral, é algo que para nós non teñen ningunha importancia, é unha opinión dun compañeiro máis", indicou.
ELECCIÓNS GALEGAS
De cara ás eleccións galegas, Pilar Cancela considerou que os socialistas están "no camiño correcto" para "ter un presidente da Xunta socialista nos próximos meses".
Na análise electoral relativa á provincia de A Coruña, Cancela indicou que o PSOE "subiu en votos", o que fai ter unhas "expectativas moi positivas de cara ás eleccións autonómicas", aínda que recoñeceu que "non é para estar a dar saltos de alegría".
Tras unha "análise tranquila", os socialistas galegos comezarán xa a "planificar e falar" dos comicios galegos, xa que foron "os primeiros" que fixeron os "deberes". "Nós temos a nosa folla de ruta e temos os deberes feitos, os que teñen que facelos agora son outros", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.