Novas divisións en Podemos Galicia por incumprimentos do Código Ético
A dirección di que os dous congresistas e o senador non estaban ao día para trasladar parte do seu salario á organización. A petición partiu da área de finanzas do Congreso dos Deputados e Senado.
Por E.P. | SANTIAGO DE COMPOSTELA | 19/07/2016 | Actualizada ás 15:55
Nova división en Podemos Galicia, desta volta, polo suposto incumprimento do Código Ético por parte dos dous deputados; Ángela Rodríguez e Antón Gómez-Reino e o senador José García Buitrón. A dirección galega deste partido criticou os retrasos no pago de cotas pola súa condición de parlamentarios e senador, respectivamente.
A petición para regularizar as súas doazóns á formación morada partiu da área de finanzas do Congreso dos Deputados e Senado, segundo explicou a dirección galega deste partido.
Nun comunicado despois de que se publicase a acta do 20 de xuño da Comisión de Garantías de Podemos Galicia, no que se informa do requirimento aos dous deputados e exsenador para que fixesen efectivas as doazóns e unicamente cobrasen os tres salarios mínimos interprofesionais como recolle o código ético, o secretario de Organización de Podemos Galicia, Juan Merlo, explicou que o proceso que se recolle na acta da comisión de garantías parte dunha petición da área de finanzas das Cortes.
Así mesmo, engadiu que "a cuestión obedece a unha falta de protocolo máis que a unha vontade das partes, ao non se consolidar En Marea como un grupo parlamentario propio", se ben o que se tratou na comisión de garantías é o relativo a Podemos, á marxe da coalición.
No comunicado explícase que tanto Gómez-Reino, que é membro crítico coa dirección actual do Consello Cidadán Autonómico, como García Buitrón, están "completamente ao corrente nas súas doazóns ao partido e aos proxectos sociais e económicos que dende Podemos impúlsanse".
Pola súa parte, Ángela Rodríguez, que foi a rival de Carmen Santos (xunto a Breogán Riobóo) nas primarias internas de Podemos Galicia aínda non regularizou esta situación, pero "atópase en prazo para facelo". Pola contra, a comisión de garantías procedería a abrirlle expediente, segundo recolle a resolución do 20 de xuño, que non se publicou na web ata este martes, coincidindo coa constitución das Cortes Xerais, aínda que se redactou en plena campaña electoral para o 26 de xuño.
O ámbito dos dous deputados aseguraron a Europa Press que a situación está "tramitada e solucionada", pero fontes da dirección de Podemos Galicia aseguraron que a deputada por Pontevedra aínda non fixo a "regularización" da súa situación como pediu a comisión de garantías.
Os deputados de Podemos e En Marea están suxeitos a un código ético que implica que non poden cobrar máis de tres salarios mínimos interprofesionais e o resto teñen que doalo para financiar a coalición e o partido.
"ABSOLUTAMENTE INDEPENDENTE"
Podemos Galicia remarca no seu comunicado que a Comisión de Garantías "é absolutamente independente da dirección política na Comunidade Autónoma, como precisamente marcou o documento político organizativo co que Carmen Santos foi elixida secretaria xeral o pasado mes de abril".
"A Comisión de Garantías de Podemos Galicia actuou, como era de esperar, con absoluta independencia da dirección política autonómica e transparencia cos inscritos e a sociedade", di a formación morada nun comunicado.
EN CAMPAÑA DÍXOSE QUE SE DOARA
Precisamente, en plena campaña electoral, e a propósito da polémica do cobramento da liquidación do Senado, García Buitrón xustificara este cobramento para financiar o proxecto político de En Marea e de Podemos, xa que en ambos os dous casos teñen por norma non recorrer a créditos bancarios, e asegurou (a preguntas en rolda de prensa o 13 de xuño) que só quedou, tanto do salario coma da liquidación, con tres salarios mínimos interprofesionais.
Concretamente, preguntado por se o que supera os tres salarios mínimos interprofesionais o doan a En Marea ou o quedan persoalmente para financiar as campaña electorais, Buitrón aclarou, nesa rolda de prensa, que "non é para eles persoalmente", senón que En Marea "dispón dese tipo de economía que se transfire dos seus salarios" para as "actividades políticas colectivas".
Fontes de En Marea consultadas por Europa Press explicaron que os donativos dos deputados faltan por ingresar na conta bancaria común, posto que non se chegou a abrir na lexislatura curta anterior, pero as contías están "retidas" nas súas respectivas contas á espera de que se poida formalizar a transferencia.
De feito, fontes do ámbito dos deputados de Podemos Galicia culparon a En Marea e a Podemos Galicia da situación de non poder regularizar a situación económica, pero insistiron en que está "tramitado e solucionado".
PRINCIPIOS DO CÓDIGO ÉTICO
Un dos principios do código ético é a "transparencia económica" e aos "límites salariais", segundo recolle o acordo político asinado pola coalición que se presentou o pasado mes de decembro e en xuño. Para tal efecto, existe o compromiso de facer públicas as declaracións de bens, renda e, se é o caso, de patrimonio.
"Non dispoñer, en ningún caso, de contas bancarias ou intereses económicos en paraísos fiscais" e "percibir un único salario, salvo que este sume menos de tres salarios mínimos" son outros dos compromisos éticos dos membros da coalición vinculados coas percepcións económicas.
