Chega o primeiro buque cargado con metano a Galicia tras 40 anos de vetos
O cargamento, de 135.000 metros cúbicos de gas licuado, chegou xa a Ferrol ante a protesta de máis de 40 plataformas cidadás que denuncian que se trata do "pistoletazo dunha importación masivas de gas de fracking".
Por Europa Press / Redacción | MADRID | 22/07/2016 | Actualizada ás 12:35
Máis de 40 plataformas cidadás e organizacións ecoloxistas denunciaron a chegada a España do primeiro buque metaneiro cargado de gas procedente de Estados Unidos despois de que o país levantase a finais de 2015 o veto á importación que mantiña dende 1975. Trátase do segundo cargamento de gas estadounidense con destino Europa tras o que chegase a Portugal esta primavera.
Segundo os denunciantes, entre os que se atopan as ONG 'Amigos da Terra' e 'Ecoloxistas en Acción', este feito supón "o pistoletazo a unha importación masiva de gas de fracking (extracción de gas por presión hidráulica) dende o outro lado do Atlántico.
O barco chegou esta madrugada ao porto de Ferrol proveniente de Sabine Pass, no golfo de México, con 135.000 metros cúbicos de gas licuado. O seu cargamento almacenarase na planta coruñesa de Reganosa, recentemente suspendida da súa autorización administrativa polo Tribunal Supremo.
Este, non obstante, non é o primeiro que sae de costas estadounidenses, xa que en febreiro de 2016 se exportou o primeiro cargamento internacional de gas a Brasil.
Para os ecoloxistas, o fracking "supón unha ameaza que segue vixente en Europa" e afirman que "estar hoxe contra o fracking" é "estar conta a importación de gas licuado". As organizacións lamentan que "a pesar dos abandonos por parte de diversas empresas ou da oposición institucional" xa se practicara en países como Polonia e que noutros como Reino Unido ou España haxa trámites avanzados ao respecto.
Así mesmo, inciden en que a aprobación por parte da Comisión Europea de varios documentos como a 'Estratexia europea para o Gas Natural Licuado e o Almacenamento de Gas', supoñen "un pulo á importación de gas natural a pesar de que a demanda vén caendo nos últimos anos".
En relación á chegada do buque e co lema 'Nin aquí nin en ningún sitio', o Comité Cidadán de Emerxencia para a Ría de Ferrol organizou unha manifestación este venres, 22 de xullo, para mostrar "a súa oposición ao fracking e a Reganosa" ás 20 horas fronte ao Edificio da Xunta de Galicia, en Ferrol.
