Case o 50% dos economistas galegos apostan pola redución do IVE para impulsar o crecemento
Sitúan o paro e a inadecuada dimensión da estrutura das empresas galegas como o problema máis importante.
Por E.P. | A CORUÑA | 01/08/2016 | Actualizada ás 18:12
O 48,6% dos economistas galegos aposta pola redución do IVE como principal medida de política fiscal para impulsar o crecemento económico, segundo o 'Barómetro de Economía' realizado polo Consello Galego de Colexios de Economistas correspondente ao primeiro semestre de 2016.
De acordo coas conclusións do estudio, os profesionais consultados sinalan o cambio no imposto de sociedades e no IRPF como outros elementos claves da mellora económica.
Os datos foron presentados este luns na Coruña polo director da publicación, Venancio Salcines, e pola directora do estudio, María Jesús Freire Seoane, profesora titular do departamento de Análise Económica na Facultade de Ciencias Económicas e Empresariais da Universidade da Coruña (UDC).
No acto, na sede colexial coruñesa, tamén participou o presidente do conselo e decano do Colexio de Economistas da Coruña, Miguel Vázquez Taín.
A FAVOR DA BAIXADA DO IVE
De acordo cos resultados desta enquisa, defenden a redución do IVE os enquisados dos sectores de servizos (66,7%), industria (54,6%) e banca e seguros (53,3%).
Mentres, os profesionais que traballan no sector da construción son os que demandan, en maior medida (50%), unha redución do IRPF. Os empregados no sector de consultoría e asesoría e os da Administración pública son os que indican, con maiores porcentaxes, que baixar o imposto de sociedades sería unha opción interesante para o crecemento.
SITUACIÓN DA ECONOMIA GALEGA
Os datos sobre a percepción dos economistas respecto á situación da economía galega en relación ao ano anterior mostran que o 32,63% perciben a situación como "mellor", o 40,33% di que "igual" e o 27,04% cualifícana como "peor".
Se se compara a evolución desta opinión sobre a economía galega ao longo dos barómetros anteriores dende o ano 2010 ata o momento actual, os profesionais opinan que a economía se estabilizou, aínda que a cualificación de "peor" cambiou o seu signo descendente iniciado en 2012, crecendo neste primeiro semestre de 2016 ata máis de oito puntos.
Para o conxunto dos profesionais, o paro segue sendo o problema máis importante (72%), seguido da inadecuada dimensión da estrutura das empresas da comunidade (51%), o déficit de infraestruturas e comunicacións (41%), a debilidade na demanda interna/externa (37%), a escaseza de crédito (32%) e os custos laborais (30%).
