Guerrera e Bala, o máis poderoso do novo rock galego, en Ferrol
O Centro Cultural Torrente Ballester de Ferrol acolle esta semana unha nova edición da Feira dos Xoves. Nesta ocasión con dúas das bandas máis poderosas do rock galego dous últimos anos, as mozas de Bala e os mozos de Guerrera.
Por GC Tendencias | Ferrol | 29/08/2016 | Actualizada ás 17:31
Bala é un dúo coruñés formado por Ánxela Baltar e Violeta Mosquera. Ruidosas, duras e veleoces, o seu son ten influencias do grunge dos anos 90 e tamén de bandas como Melvins ou Pentagram. Este verán actuaron en festivais como Atlantic Fest, Ignition, Festival El loro Facu, SonicBlast Moledo, O Marisquiño e Osa del Mar.
Guerrera é unha banda viguesa de hard rock con tintes psicodélicos famosa polos seus directos longos e musculosos. Despois de xirar por todo o país este verán, están a piques de publicar o que será o seu terceiro disco. Os membros deste combo proveñen doutras bandas galegas da escena independente (Ictus, Holywater, Cuzo, Cró!, Disappointment). En 2013 debutaron cun disco titulado “Under The Gipsy Sun” e este ano estrearon o volcánico “Mauna Loa” que insiste na vía lisérxica vía stoner rock, música negra, ritmos latinos e, sobre todo, moita paisón e suor.
As entradas xa se poden mercar en Ataquilla dende só 5 euros. Organizada por Run-Rum Axencia, a actuación comeza as 9 do serán.
