Por E.P. | VIGO | 02/09/2016 | Actualizada ás 18:16
Investigadores do Consello Superior de Investigacións Científicas (CSIC) e da Universidade de Vigo lograron obter a primeira versión do xenoma do mexillón galego, o primeiro paso para iniciar o estudio dos xenes deste molusco ata alcanzar a súa secuenciación e anotación completa.
Estas primeiras investigacións, publicadas na revista SCI PLOS ONE, son froito de cinco anos de traballo conxunto entre o Grupo de Filoxenómica da Uvigo e do Grupo de Inmunoloxía e Xenómica do Instituto de Investigacións Mariñas do CSIC en Vigo.
Neste traballo, financiado pola Xunta de Galicia, os investigadores do CSIC encargáronse do traballo de laboratorio e análise dos xenes de inmunidade, mentres que os científicos da universidade se ocuparon da ensamblaxe e anotación das secuencias.
Así, se descubriu que o xenoma do mexillón é moi complexo, cun alto contido de secuencias repetidas e un elevado número de polimorfismos. En comparación cos xenomas doutros moluscos, identificouse un maior número de xenes con funcións adaptativas, como a detoxificación e mantemento de estruturas ciliares.
Os científicos completarán o xenoma nos próximos meses para coñecer mellor o comportamento xenético deste molusco, o que pode permitir explotar no futuro o seu potencial biotecnolóxico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.