Por E.P. | O Porriño | 13/09/2016 | Actualizada ás 11:01
Un técnico da Comisión de Investigación de Accidentes Ferroviarios (CIAF) afirmou este martes que "o único que se sabe", en relación ás causas do sinistro do 'Tren Celta' o pasado venres no Porriño (Pontevedra), "é que todo apunta a que foi un exceso de velocidade". Así o manifestou o técnico Edmundo Parras á súa chegada aos xulgados do Porriño para asistir, xunto con representantes de Renfe; Adif e Comboios de Portugal, á obtención dos datos da caixa negra do tren.
Parras explicou que o labor da CIAF, na que hai funcionarios en activo e xubilados expertos en ferrocarril, "non é buscar culpables", senón detectar problemas e "debilidades" para "facer recomendacións que melloren o sistema ferroviario".
Hoxe é o día no que se obteñen os datos da caixa negra en presenza da titular do Xulgado de Instrución Número 2 do Porriño que investiga o accidente. Neste sistema de rexistro quedan gravados datos como velocidades e distancias; así mesmo quedaron plasmadas as posibles chamadas dende o teléfono 'tren-terra' aos postos de mando.
Mentres, os restos do convoi accidentado permanecen na estación de ferrocarril de O Porriño custodiados pola Guardia Civil, á espera da autorización xudicial para o seu traslado a dependencias de Renfe en Redondela (Pontevedra).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.