Cáritas abre en Pontevedra unha tenda de roupa reciclada a través do proxecto 'Arroupa'

Cáritas abriu no número 22 da rúa Eduardo Pondal de Pontevedra unha tenda de segunda man e restos de stock, promovida pola entidade a través do proxecto denominado 'Arroupa'.

Na inauguración destas dependencias participaron Jesús García Vázquez e José Anuncio Mouriño Rañó, delegado episcopal e director diocesano de Cáritas Diocesana de Santiago de Compostela.

Esta iniciativa da Fundación Cáritas Diocesana de Santiago de Compostela (Cadisan) persegue a asistencia, o fomento da economía social e a promoción e atención ás persoas en risco de exclusión social.

A tenda da cidade do Lérez contribuirá a xerar emprego para persoas en risco de exclusión social, que é o fin último que busca este proxecto coa incorporación ao mercado laboral deste colectivo proporcionándolles un traballo remunerado, a formación e acompañamento necesarios para a mellora das súas condicións de empregabilidade.

O material téxtil recollerase nos 56 roupeiros de Cáritas e en case un centenar de colectores que se van instalar en toda a diocese. Na planta clasificadora e de tratamento, situado nunha nave do Polígono Industrial do Tambre de Santiago, o material dividirase entre aquel que é reutilizable e o que non o é, que será reciclado.

A venda que se xere nestas tendas será unha parte importante para o soporte económico da empresa. Os recursos económicos que se obteñan serán reinvertidos en inserción laboral.