Feijóo tamén gaña en Twitter con folgura
O líder do PPdeG é o máis popular entre os candidatos a presidir a Xunta e acapara o 41% das mencións, seguido po Luís Villares, de En Marea, que consegue o 22%, nunha mostra representativa de 11.320 chíos recollidos entre o 9 e o 18 de setembro con mencións directas aos principais cabezas de cartel.
- Todas as enquisas apuntan a unha nova maioría absoluta de Feijóo, a unha semana das eleccións
- Fai o PP guerra sucia na campaña electoral?
- Feijóo acapara a atención no #DebateCRTVG en Twitter
Por Alberto Quian | Santiago de Compostela | 19/09/2016 | Actualizada ás 17:00
Non só as enquisas lle son favorables a Alberto Núñez Feijóo. As redes sociais son outro campo de batalla e termómetro da contenda política e aí, o candidato do PPdeG á Presidencia da Xunta tamén se impón en popularidade aos seus rivais con insultante folgura, a que lle dan os seus partidarios, pero tamén os seus detractores, cando menos en Twitter. Feijóo nunca foi un gran usuario de Twitter, actividade que só reserva para épocas de campaña electoral autonómica. Pero lle basta para espallar a súa imaxe dixital por todos os recunchos e facerlle sombra aos seus contricantes. Del fálase máis que de ningún outro —como se acostuma dicir, "que falen de min, aínda que sexa mal"— e é quen centra as conversas e a atención en Twitter, en plena disputa electoral. Cabe preguntarse pois, se non son só os simpatizantes e os medios de comunicación quen máis popularidade lle dan a Feijóo en Twitter, senón tamén os seus adversarios, ao focalizar boa parte das súas mensaxes no líder do PPdeG.
GC puido recoller unha mostra de 11.320 chíos publicados entre o 9 de setembro —día no que se iniciou a campaña— e o 18 deste mes, nos que se mencionan directamente os perfís dos principais candidatos á Presidencia da Xunta: Alberto Núñez Feijóo (PPdeG), Xoaquín Fernández Leiceaga (PSdeG), Luís Villares (En Marea), Ana Pontón (BNG), Cristina Losada (Ciudadanos) e Xoán Bascuas (Compromiso por Galicia). E nesta mostra representativa, Feijóo gaña por goleada aos demais, co 41% de todos os chíos mencionando a conta do candidato popular, case o dobre que o segundo, Villares, quen acapara o 22%.
Trátase dunha mostra representativa e aleatoria, non do total de chíos publicados neste período de tempo, pero dada a súa amplitude, dá unha idea clara da popularidade duns e doutros en Twitter. Así, dos 11.320 tweets analizados, atopamos 4.679 mencións directas a @FeijooGalicia, é dicir, o 41% do total. Por detrás, @VillaresLuis acadou 2.498 mencións, isto é, o 22%. Tras o candidato de En Marea ábrese outra fenda importante co resto de candidatos. E chama a atención que é a líder de Ciudadanos en Galicia, Cristina Losada (@christinalosada), quen ocupa a terceira posición con 1.721 mencións, é dicir, o 15% do total, superando ao socialista Xoaquín F. Leiceaga (@Leiceaga2016), para cuxa conta contabilizamos 1.403 referencias, o 13% de todas as recollidas nesta mostra. No caso da líder do BNG, Ana Pontón (@anaponton), son 923 mencións, isto é, o 8%. Por último, o candidato de Compromiso por Galicia, Xoán Bascuas (@Xoan_Bascuas), goza de moi pouca popularidade, acadando tan só 96 mencións, que case non chegan ao 1%.
Feijóo é tamén quen máis seguidores ten nesta rede social, con 10.027, seguido por Ana Pontón, con 6.6628; Cristina Losada, con 6.543; Villares, con 5.420; Bascuas, con 3.965, e por último, Leiceaga, quen suma tan só 1.379 no seu perfil electoral, se ben o candidato socialista ten outra conta persoal, @XoaquiFLeiceaga, que é seguida por 2.193 usuarios. Son datos de hoxe, 19 de setembro.
Velaquí os resultados visualizados en gráficos:
