Por E.P. | SANTIAGO DE COMPOSTELA | 05/10/2016 | Actualizada ás 19:14
O poeta Francisco Cortegoso (Frank Euner) faleceu este mércores na súa casa de Bora (Pontevedra) aos 31 anos, segundo informou Chan de Pólvora Editora. No mesmo día no que o seu último día chegou ás librarías, 'Suicidas', Cortegoso faleceu tras meses de loita contra a enfermidade que padecía.
Nun comunicado, o equipo de Chan de Pólvora -Antón Lopo, Manolo Martínez e Gonzalo Hermo-, que publicou 'Suicidas', mostra a súa "inmensa tristura" e traslada as súas condolencias a familia e amigos.
Segundo describe a editorial, 'Suicidas' son "un dos máis importantes e conmovedores textos da poesía galega das últimas décadas". "Calquera que se achegue a este libro non quedará indemne, hipnotizado por un dos escasos exemplos de libro-concepto que se deron na nosa literatura, un volume onde a linguaxe axexa formas que o encaixen na idea que transmite, nun discurso radical e ao tempo harmónico", destaca Chan de Pólvora.
Francisco Cortegoso (Pontevedra 1985) deuse a coñecer en 2008 en Revista das Letras con 'Ningún home', un conxunto de poemas nos que xa se asomaba 'Suicidas'. A súa obra, que se pode atopar en volumes colectivos en revistas como Gria, complétase con títulos como 'Carta ao poeta español', un libro aínda inédito, que xorde como diálogo coa obra de Leopoldo María Panero. En 2013, conseguiu o Premio Pérez Parallé con 'Memorial e danza', editado ese ano por Espiral Maior.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.