ALFREDO SUÁREZ CANAL: "Vou seguir para que isto non volva a pasar"

A.S.C.- Mal se pasou porque cando es a autoridade completa de facer fronte a unha situación na que hai unha actividade incendiaria desaforada e unha situación que lle afecta á xente, con miles de hectáreas do teu país queimadas, e tes un mínimo de sensibilidade pois o pasas francamente mal.

GC- Afectoulle persoalmente?

A.S.C.- Paseino mal pero supoño que como calquera que ten unha sensibilidade polo que está pasando e tes unha responsabilidade política e porque ves o que pasa e non podes combater os delincuentes que queren facer dano ao país.

GC- Constame que pensou en deminitir e que valorou esta posibilidade coa sua xente máis próxima?

A.S.C.- Non nese momento. En toda a situación complicada pensar na peripecia persoal e política non era o máis adecuado nin o máis sensible. No que pensaba nese momento era en empregar todo o meu esforzo e capacidadade en facer fronte a unha situación para reclamar medios, para axilizar o funcionamento dos medios, para estar ao pé do canón nas tarefas de extinción e para tentar mitigar o impacto da situación. Por iso, nese momento, non me pasou pola cabeza demitir.

Con posterioridade, e cando ves o impacto que se ten producido, pois como calquera persoa que ten responsabilidades políticas, é lóxico poñer de cara o futuro todas as variables enriba da mesa, poñendo como peza fundamental intentar que non se volva repetir. Dentro desta evaluación tamén considerei a posibilidade de que, de cara ao futuro, se poidera producir un relevo nesta responsabilidade.

GC: E por que non o fixo?

A.S.C.- Nese proceso de reflexión cheguei a conclusión de que o que estaba ocurrindo era producto dunha actividade delictiva, de xente que quere queimar o monte, e nesa situación, analicei que non había razóns políticas fundadas para dicir que as miñas actuacións contribuiran a incrementar, ben por acción ou por omisión, esta actividade delictiva. Por iso, cheguei a conclusión, que a pesar dos erros cometidos, nin por omisión nin por acción, fun responsable de aumentar signfiicativamente o resultado da catástrofe. Non o vexo en ningunha das decisión que se me imputan por parte do PP e que foron caíndo polo seu propio peso...

DEMISIÓN

GC.- Pero o PPdeG segue pedindo demisións?

A.S.C.- O PPdeG instalouse na política do regateo curoto e de curto prazo para sacar rendabilidade política e eu creo que de forma absolutamente equivocada e, mesmo nalgúns casos, recurrindo a faltar á verdade. Eles saben que eu non desmontei o dispositivo contraincendios, nin que son o responsable do retraso xa que as brigadas estaban operativas en agosto e que non hai decisións políticas relevantes imputables a isto... En realidade, o dispositivo que estaba funcinando, con matices, era o mesmo que xa eles deixaran montado.

Eles quixeron exemplificar que aquí había unha catástrofe de proporcións inimaxinables e é certo que foi unha catástrofe importante que nós non quixemos minimizar, pero non podemos esquencer que durante os 15 anos de goberno popular arderon máis de 500.000 hectáreas. Se esta é a maior catástrofe, o PPdeG tivo varios anos a metade desta catástrofe. Por iso se equivoca quen frivoliza este asunto para sacar rendabilidade política porque está poñendo paus na rede para que no futuro sexa difícil buscarlle unha solución.

GC.- Aínda así, algo pasou para que arderan 77.000 hectáreas?.

A.S.C.- Seguramente si.

GC.- Entón, non cre que Xunta non estivo á altura das circunstancias?

A.S.C.- O que pasou foi imprevisible. As estatísticas evidencian que non era previsible. Un dispositivo non pode estar feito para o pico máximo. Todos sabemos que en Galiza hoxe non se vai producir un terremoto de forza 8 na Escala Ritcher. Ninguén o pode asegurar ao 100%, pero é unha probabilidade. Entón, teriamos que ter un dispositivo de emerxencia e protección civil deseñado para un terremoto de escala 8?. É imposible polo custe, polo que significa e pola escasísima probabilidade de que iso se produza... Nos incendios, o dispositivo que teríamos que ter é o que tivemos con posterioridade os primeiros lumes de agosto e iso suporía multiplicar o custe do actual dispositivo por 5 ou 6, o cal non se pode sustentar. Polo tanto, é unha situación imprevisible que non entra dentro das posibilidades e iso sí que o podemos demostrar.

GC.- Como?

A.S.C.- Porque a Xunta, a unha situación imprevisible, respondeu como en ningunha outra circunstancia se ten respostado en Galiza; con axilidade, con prontitude e activando todos os protocolos que permitiron que o día 15 de agosto, antes de que viñeran as chuvias, tiveramos todos os incendios totalmente controlados. As chuvias é certo que axudaron a enfriar toda a masa combustible e evitar que se reavivaran. Pero a situación estaba controlada porque, dende o día 4, xa se comezaron a activar todas as solicitudes e protocolos e o día 5 xa tiñamos aquí medios do Estado e doutras autonomías e o día 6 xa está o Exército operando en labores de protección como nunca tiña ocurrido en Galiza.

GC.- Fala do Exército, pero vostedes sempre foron críticos a que os militares actuaran en tarefas de extinción de lumes?

A.S.C.- Ese é outro dos argumentos falaces. Os responsables da administración anterior nos transmitiron esa colaboración puntual, que estaba completamente acotada a dous lugares e que eran 4 ou 5 persoas que estaban nun sitio puntual e se cambiaban nuns días. Está claro, que co número de incendios que había, a súa función era irrelevante.

Por iso, pensamos que esas persoas e ese custe podería adicarse a outras cousas máis operativas na extinción de incendios. Pero nós non fixemos máis que recoller unha xestión dos responsables anteriores. Non cabe na cabeza de ninguén que cambiemos todo nada máis chegar, porque foron, principalmente, os responsables anteriores os que nos dixeron que iso era relevante e non o cambiamos. Tanto é así que os propios responsables anteriores, cando lles pedimos continuar, continuaron prácticamente todos os que quixeron continuar. Por iso, a decisión nosa non era que algo que nos transmitían que podía ser útil o borraramos do mapa porque nolo dicían eles. Foi todo o contrario.

GC.- Constame que durante a vaga de lumes, e principalmente, durante os primeiros días estaba vostede pegado ao teléfono falando con moita xente pero, especialmente, co presidente da Xunta. De que falaba con Touriño neses momentos?

A.S.C.- Dende o primeiro momento, xa dende o primeiro día que se produce a morte das duas mulleres de Cerdedo xa estou en contacto co prsidente para transmitirlle a situación, que é complicada porque xa empeza a haber unha actividade delictiva moi grande. Comezamos a falar dos dispositivos. Eu dígolle que estou activando os protocolos para solicitar axuda ao Estado. O seguinte día seguín falando de cómo está a situación, que incendios son os máis complicados, que medios van vir ou non. O propio domingo, o presidente visita o centro de coordinación e emerxencias. É dicir, dous días despois da situación complicada, e xa cun trámite de constante contacto, anunciolle que imos solicitar a presencia do Exército para niveis de alerta 1 en Pontevedra para labores de protección civil e tamén falamos de activar un mecanismo de coordinación con membros do goberno e tamén do Estado. O luns activase unha comisión de seguemento do Goberno galego.

COORDINACIÓN

GC.- Entón, houbo moita sintonía entre ambos os dous neses días?

A.S.C. Si, si, sen dúbida.

GC.- Entón, por que fala vostede, neses primeiros momentos, de que a situación é moi complicada e Touriño asegura que está todo controlado?

A.S.C.- Cada un ten a súa forma de espresarse, aínda que ás veces se buscan circunstancias en espresións determinadas para intentar facer dano político no curto prazo. Que unha situación sexa complexa non quere dicir que esté descontrolada. Cando (Touriño) fala de que está controlada se refire a que xa están todos os dispositivos funcionando e temos xa os protocolos activados, mesmo os de pedir axuda fora. Polo tanto, todo o operativo está activado, e iso tampouco significa que todos os incendios estén controlados, senon que as decisións políticas están activadas, os protocolos tamén e os responsables políticos ao fronte da situación. E isto non significa que non haxa unha situación de emerxencia. Son perfectamente compatibles as duas cousas.

GC.- Dígame a imaxe que lle vai quedar grabada de toda esta traxedia?

A.S.C.- Hai moitas imaxes, pero a que máis me impactou é a de ver a todo o pobo, aos voluntarios, ás brigadas, a moita xente de fora que deixaron as súas vacacións, dos responsables públicos ao pé do canón. Ver que, cando hai unha situación complicada, dende os responsables políticos, ata o último veciño e voluntario, se entregan para solucionar una situación complicada.

GC.- Lémbrame moito esta imaxe a que xa vivimos cando foi a catástrofe do Prestige.

A.S.C.- Eu aquelo vivino dende a oposición e dende a miña colaboración como voluntario individual, pero non dende o punto de vista dun responsable político. Aquí sí que vivín múltitude de espresións de solidariedade; no plano persoal e de colaboración, multitude de xente que quere axudar cunha entrega solidaria impresionante.

GC.- E non lle vai quedar, coma a moitos dos seus compañeiros do goberno, a imaxe do líder da oposición apagando unhas cinzas cunha magueira?

A.S.C.- Iso é unha anécdota que debemos tentar que pase xa á historia.

GC.- Cal é a puntaución que lle da ao PPdeG durante esta crise?

A.S.C.- A min o que me preocupa nestes momentos é que a oposición se equivoca intentando instrumentalizar isto no curto prazo. Todos deberiamos estar interesados en que non haxa incendios, sobre todo, de que teñan un balance de 500.000 hectáreas queimadas detrás e, nalgúns anos con máis de 50.000. Por iso, debería ser o primeiro interesado en que todos tentemos resolver este problema e non entrar na responsabilidade política a curto prazo. Pareceme que é unha perspectiva totalmente equivocada e, por iso, o lamento.

GC.- Aínda así o PPdeG está a pedir con insistencia unha Comisión de Investigación que vostedes, PSdeG e BNG, negan insistentemente. Lembro perfectamente que, vostede, como voceiro parlamentario, pediu tamén con insistencia a creación dunha Comisión de Investigación durante o Prestige.

A.S.C.- Eu sempre dixen que non me preocupaba a cuestión semántica, entre outras cousas, porque sei, pola historia parlamentaria, que das cuestións semánticas se poden facer auténticas virguerías e podemos ter unha comisión de investigación con ese nome e alguén quere boicotela.

A min o que me preocupaba era o contido desa comisión e eu, dende o principio, puxen todo o meu empeño para conseguir que nesa comisión se coñecera toda a verdade do que pasou entre o 4 e o 14 e puxen todo o meu esforzo persoal para que o primeiro punto da comisión fora averiguar todo o que pasou entre o 4 e o 14 e non houbera ningún tipo de límites a que, se se deriban responsabilidades políticas desa investigación, se poidan pedir por parte da comisión, e que ese dictame se leve o pleno.

Pero tamén dicía que me parecía importante, por compromiso co país, e por non separar as cousas e aproveitar a experiencia destes 12 días, que, paralelamente, se tiñan que poñer enriba da mesa as propostas de conclusión para o futuro. É dicir, hai que investigar, analizar e averiguar todo o que pasou e sacar propostas para o futuro.

O PpdeG só quere a primeira parte do asunto e non a segunda e eu invito a todo o mundo que diga se ese primeiro punto da comisión non permite averigurar todo o que se queira xa que o dictame será tratado no pleno e se se derivan responsabilidaes políticas que se poñan tamén enriba da mesa.

Polo tanto, o que eu digo é que aí houbo un xogo de política de curto prazo e de utilizar a semántica, porque se se puxera comisión de investigación e estudio, o PPdeG terianos dito que non lle interesa o estudo e só quere a investigación. E no tema dos incendios o que temos que ter craro é que é moi importante investigar o que pasou ata as últimas consecuencias.

Eu teño craro, ademáis, que a verdade neste asunto é fundamental e é máis útil que a peripercia individual dunha persoa ou dunha forza politica.

COMISIÓN DE INVESTIGACIÓN

GC.- Pero se é unha cuestión de semántica por que non se falou de investigación, aínda que haxa estudo?

A.S.C.- Pero o que eu me pregunto é o que faltou nesta comisión para que sexa de investigación.

GC.- Hai quen fala dentro do seu gabinete que foi o PSdeG quen non quixo entrar niso?

A.S.C. Eu creo que nese tema non deberiamos entrar... Eu o único que lle pido a oposición é que mire o límite desa comisión para que non sexa de investigación. Que se diga algún argumento. Esquezamos o nome porque, ademáis, é comisión de averiguación do que pasou. Se alguén vai a un diccionario e busca estudar; é o mesmo que averiguar. Se queremos, pois poñemos no primeior punto: comisión de averiguación do que pasou. Non hai ningún problema. Agora sí; investigar e, a maiores, estudar. Iso se lle ofrecou recurrentemente ao PPdeG e dixo que non. E é certo que chegamos ao 14 de agosto con 77.000 hectáreas queimadas, pero é que antes temos 500.000. Por iso, tentar resolver iso xa é coñecer a verdade e se hai que derivar responsabilidades políticas, que se deriven, pero ao mesmo tempo que se faga o outro. E iso o PPdeG non o quere e vemos o que pasa, que se chamaron a responsables do PPdeG e o que lles importa é o numerito (refírese a actuación do alcalde de Barro). Iso é o que ocurriría nunha comisión de investigación. Alí a facer o numerito e dicir o que lle interesa.

Ao PPdeG non se lle puxo límite para acudir á comisión; todo tipo de alcaldes, mesmo os máis controvertidos; presidentes de diputacións; todo tipo de asociacións forestais, empresariais; representante dos traballadores; técnicos e expertos. É a primeira vez que comparece o Delegado do Goberno en Galiza, a Garda Civil, a través do Seprona. Digo eu que é unha comisión profunda para facer investigación. Se o PPdeG quere facer unha cabriola a curto prazo, ese será o seu problema.

GC.- Falando do Seprona, o seu representante dixo que non había tramas?

A.S.C.- Se di iso será que non hai tramas. Eu non teño por que poñelo en dúbida.

GC.- Pero houbo responsables políticos que sí o puxeron en dúbida?

A.S.C.- Pero por parte do Goberno da Xunta, nunca. Eu non lembro que ningún responsable da Xunta falara abertamente de trama.

GC.- Houbo ministros, como Rubalcaba, que sí o dixeron abertamente?

A.S.C.- Si, bueno... Pero eu non entro no que se pode dicir en declaracións puntuais en determinados momentos. Eu digo que o que pasou é excepcional, que hai unha actividade delictiva diferente doutros anos, ademáis da que xa había: pola cantidade de lumes, pola súa concentración e por como se lle prantaba. E desta vez existía iso que antes era simbólico e que aparecía de forma cuantitativa, cualitativa e nunha zona do territorio puntual. Cal é o mobil diso?. Eu non o podo dicir, sobre todo, cando dos 1.600 incendios que houbo en 12 días, están imputadas como moito 100 persoas. Polo tanto, quedan 1.500 incendios por esclarecer. Concluir daí que haxa ou non unha trama eu deixollo aos corpos de seguridade do Estado. Falar de actividade delictiva que está sen esclarecer e chegar á conclusión de que é igual que a doutras veces, é prematuro. Por iso, o prudente dos responsables políticos é reseñar o que podemos facer, evalualo con datos. Eu digo que só hai unha actividad diferente, e se iso responde a concertación de vontades ou a actividades individuais, xa non sei. Houbo fiscais que falaron de cambio na política forestal . Eu aí non entro. Pero digo que para moitos dos incendios, para esa actividade delictiva, houbo pensamento delictivo, capacidade de organización e intento de facer dano. Iso antes non pasaba; e se pasaba era simbólicamente e esporádicamente e moi de forma excepcional.

GC.- Logo do que ten pasado, arrepintese de ter acpetado a Consellería de Medio Rural?

A.S.C.- Creo que non ten moito sentido avaliar isto no plano da peripecia persoal porque eu creo que a peripecia persoal, cando hai xente que sufriu e que estivo a punto de perder a vida ou que a perdeu, e que hai xente defendendo as súas propiedades e a súa casa, pois é absolutamente irrelevante. Entón, eu o que sí teño claro é que teño a conciencia tranquila e creo que, agora, temos unha oportunidade para sentar as bases para que isto non volva a ocurrir.

G.C.- Entón, continuar é un reto para vostede?

A.S.C.- Si, si... Sen dúbida....

PREGUNTAS DOS LECTORES

O conselleiro non deixa de ollar o reloxo. Tiñamos media hora e xa levamos case o dobre falando. Aínda quedan as preguntas dos lectores e ofrecese a contestalas sen problema. Galicia Confidencial abriu esta nova sección para que sexades vos os que interactuede co propio entrevistado a través das preguntas que nos tedes remitido.

Este xornal quere agradecer infinitamente a paciencia do conselleiro porque debido a un fallo de principiantes, tivemos un erro na grabación, que nos obrigou a remitirlle novamente as preguntas dos lectores para que as voltara contestar. Cónstanos que Suárez Canal así o fixo persoalmente e dende aquí llo queremos agradecer.

1. Lectores.- Gostarialle de preguntar ao conselleiro se vai a haber un PLAN de Montes serio, que conleve o ordenamento, reforestación, limpeza, o uso, o disfrute por parte dos comuneiros, veciños e da xente...

A.S.C.- Si, vai a habelo con novas cousas que imos poñer en marcha. Pero tamén lle queremos pedir á xente que teña un pocuo de paciencia e que poña o horizonte non nun ano, porque as árbores tardan 15 anos en crecer e temos dous millóns de hectáreas de monte, moitas xa valorizadas, pero tamén outras moitas non. POr iso, as actuacións van ir paulatinamente producíndose.

2. Lectores.- Dos plans que ten a Conselleria(banco de terras, limpeza polo propietarios dos montes, ordenación do monte,...), dos que teóricamente estou totalmente de acordo, e tamen totalmente convencido da su imposible implantación nunha nación como a nosa, gostaria preguntarlle o Conselleiro que porcentaxe de aplicación pensa acadar, sendo realistas. ¿un 10%,un 5%?

A.S.C.- A aplicación será do 100% e o resultado sobre o territorio e as superficies abandonadas irase percibindo paulatinamente.

3. Lectores.- Na provincia de Soria existe o cultivo de pinheiros e com eles construiem casas pre-fabricadas. Por quê aqui nom é possível, sendo ademais o crecemento as árvores em menor tempo?

O mesmo acontece em Finlandia, e por enriba alí para fabricar um metro cúbico de madeira semelhante tarda-se quatro vezes mais. É dizer se aquí um metro cúbico de X madeira tarda-se 15 anos; esse metro cúbico, lá, tarda 45 anos.

Umha das madeiras utilizadas na Finlandia para os móveis é o bidueiro, polo seu pouco peso para assim exportar melhor os productos acabados. Por quê aquí só utiliza-se para lume ou para fazer aserrim?

A.S.C.- A perspectiva da Consellaría do Medio Rural é incrementar a presenza de máis madeira de calidade e diversificar a produción forestal do noso monte. Entre eles pode estar o bidueiro e outras madeiras destinadas á industria do moble.

4. Lectores.- Datos concretos dos plans para o medio rural: obxectivos, financiación, prazos.

A.S.C.- Co obxectivo de valorizar o medio rural como elemento estratéxico da sociedade galega preténdese contribuír ao aproveitamento do potencial produtivo do medio rural, avanzar nun modelo de produción agraria sustentable, favorecer a diversificación produtiva no medio rural, activar unha nova política forestal atendendo ao carácter multifuncional do monte e profundizar na política de prevención de incendios e profesionar o dispositivo de extinción. Nos orzamentos previstos para 2007 contémplanse partidas para a fixación da poboación do medio rural, cunha dotación de 22.605.343 euros, e para a mobilidade de terras improdutivas, cunha dotación de 15.607.865 euros. Destinaranse tamén 172.611.603 euros para a modernización e diversificación do tecido produtivo rural, para a mellora da calidade na produción agroalimentaria e para a regulación das producións agrarias e apoio á renda dos agricultores.

(Podedes consultar máis premendo aquí)

As prioridades estratéxicas da Consellaría do Medio Rural para 2007 son o fomento do relevo xeracional no sector agrario, mediante a incorporación de mozos e mozas á titularidade das explotacións, a reforma das estruturas agrarias e reorientación dos sistemas produtivos cara a patróns menos dependentes de insumos externos, a integración da política forestal no desenvolvemento rural e o deseño e aplicación dunha política forestal racional baseada na diversidade de especies forestais. Estes obxectivos compleméntase coa valorización das superficies de monte, mediante a súa ordenación, a aposta pola produción de madeiras de calidade e o aproveitamento multifuncional. Estas actuacións acompañaranse doutras medidas preventivas que contribúan a diminuír o risco de incendios forestais. Proxectos concretos son o incremento do valor acrecentado das cadeas agroalimentaria e forestal a través do fomento de producións de calidade e do peche dos ciclos produtivos; a retribución aos agricultores polas funcións ambientais, territoriais e sociais non remuneradas polo mercado; a xeración de novas oportunidades de emprego nas áreas rurais, en actividades que respondan ás actuais demandas sociais e que axuden a fixar poboación; o avance na equiparación das condicións de vida das áreas rurais coas urbanas; ou a reorientación do programa Leader, para garantir un funcionamento máis participativo e democrático e unha maior eficiencia na xestión dos fondos.

5. Lectores.- Gustaríame preguntarle ó Conselleiro si aqueles proxectos singulares chamados de silvopascicultura están ben cahamdo por ese nome. Digo esto xa que vendo a súa descripción maís ben parecen pasteiros sin maís. O uso multiple do monte nesatas zonas redúcese a usar vacas, ou cabalos ou ovellas. A parte "silvo" destes proxectos de silvopascicultura non sei onde queda. ¿Non é esta unha visión demasiado agrarista do noso medio ambiente?

¿Cal pode ser o impacto ecolóxico destas medidas?

A.S.C.- En moitos dos proxectos silvopastorís hai aproveitamento forestal dunha parte do monte. Creo que unha concepción integral de desenvolvemento do rural debe superar a confrontación agrario-forestal. Hai sitio para as dúas patas do desenvolvemento rural. As dúas son necesarias e as dúas deben cumprir unha función ecolóxica. Tanto o ámbito agrario como o forestal están a ser pilares fundamentais do desenvolvemento integral do rural.

6. Lectores.- A mín me gustaría saber por que carallo aínda non se pode ver na web da Consellería de Medio Rural os datos sobre as hectáreas queimadas, e como fixeron para contalas sen contar con ninguén do propio concello.

A.S.C.- A Consellaría publicou dende a súa chegada os datos diarios dos incendios e das hectáreas queimadas. Na crise de agosto retrasáronse as medicións técnicas porque estaban inmersos na extinción e evidenciouse por informes que os datos de anos anteriores non se axustaban á realidade. Temos que modificar para o futuro o sistema informático dos datos que se proporcionaban, xa que non nos responsabilizamos da veracidade dos datos doutras administracións anteriores. O programa informático estaba deseñado para incluír comparativamente datos como se fosen do sistema de medición actual, como se os désemos nós. Polo tanto, teremos que revisalos e daranse sempre como fixemos, día tras día, os datos dos que nos responsabilizamos. A medición realízase con rigorosas técnicas e os concellos, normalmente, non dispoñen da técnica necesaria para efectuala.

7. Lectores.- Soamente agradecerlle a Canal ó haber nombrado o mellor Director Xeral de Montes da historia de Galiza, todo un luxo para nosa nazón.Todo un profesional, con unha dilatada experiencia no eido forestal demostrada aó longo de lustros. Somos a envidia do resto do estado por ter tan ilustre D.X.Grazas, por o seu nombramento e oxala no BNG hubera máis xente tan capacitada como Alberte.

A.S.C.- Sen comentarios. En todo caso, o director xeral é un cargo de designación política e con experiencia en xestión de propiedades de montes.

8. Lectores.- Anaco literal de unha Nota de Prensa da Consellería do Medio Rural( 07/07/2006):

"Dentro da nova política da Consellaría, que pretende orientar máis recursos cara á prevención que cara á extinción, este ano incrementáronse os convenios cos concellos en materia de limpeza, desbroce e dotación de material de prevención. En consonancia con esta estratexia reduciuse o número de cuadrillas para a extinción nun 34% pero intentouse aumentar a súa eficacia ao esixir que as persoas que opten ao posto de xefe deban ter, na medida do posíbel, titulación media ou superior nas ramas agraria ou forestal".

Sen comentarios.

A.S.C.- Seguimos pensando que a política de prevención e valorización do monte é unha asignatura pendente na que xa se traballou este ano, pero os cambios estruturais notaranse a medio prazo, á que hai que dedicarlle recursos pero mantendo un potente dispositivo de extinción. As brigadas municipais que se reduciron realmente xa non formaban parte do dispositivo de extinción porque segundo os propios informes técnicos non eran operativas por distintas causas; dedicábanse a outras funcións en moitos casos, non tiñan o número de persoas adecuado nin a formación para actuar nos incendios. Eran, en non poucas ocasións, máis un problema ca unha solución.

9. Lectores.- Gostaria saber se é certo o que denuncia a CIG sobre a persoa que dirixiu a loita contra os lumes foi un exconcelleiro do PP en Ribas de Sil, que tamén foi xefe de distrito forestal co PP e que lle abriu expedientes a varios traballadores por facer campaña de Nuca Mais (Prestige) e Non a Guerra. Seica este indiviuo foi contratado para un posto de interino pero exerceu de máximo responsable do operativo contra os lumes, polos poucos coñecementos do Director Xral de Montes sobre a materia. Gostaria que Suarez

Canal expicase esta denuncia.

A.S.C.- Non se axusta á realidade esa denuncia. Observando o organigrama da Consellaría e os mandos que están á fronte dos dispositivos sábese que non se axusta á realidade esa denuncia.

10. Lectores.- Bon día e parabéns pola iniciativa. A miña pergunta para o Conselleiro Alfredo Suárez Canal é a seguinte: Falando de dinamización do rural, infraestruturas, e loita contra o

despoboamento das montañas de Valdeorras, ¿está a súa Consellería dacordo coas demandas de creación dunha estación de montaña na serra de Trevinca (A Veiga) e/ou na portela de Fonte da Cova (Carballeda)? Moitas grazas.

A.S.C.- A nosa Consellaría non ten a competencia para posicionarse sobre unha demanda dese tipo. Unha cuestión é a opinión que un poida ter e outra a posición en nome da Xunta, que debe facela a consellaría competente nesa materia.

11. Lectores.- A miña pregunta e: ¿E certo que, a maiores do asesor para os lumes forestais citado nunha mensaxe anterior, existe un tal "Tonecho" nun cargo de "asesor do Director X de Montes e Incendios Forestais" que e quen leva a voz catante na politica

florestal do pais? Cree o Sr. Conselleiro a politica de asesores na sombra e acertada o mais ben e continuista respecto do que se denunciaba cando o BNG era oposición?

A.S.C.- Non creo que o ton desprezativo sexa o adecuado para realizar a pregunta. En calquera caso, a política de asesores do BNG é transparente, está publicada na páxina web, e ten por obxecto entre outras cousas aforrar recursos e asistencias técnicas.