O grave problema do pirata somalí

Parece o guión dunha película cómica pero se presume cun fondo totalmente dramático e tráxico, porque a crónica xudicial dos piratas somalís que trouxeron a España, e sobre todo, o menor de idade, non parece a crónica real dun país desenvolvido do 2009...

Por Serafín Martínez | Galicia | 31/10/2009

Recordemos que eses asaltantes foron apresados pola fragata española que patrulla no Índico. Por iso se difunde a noticia como un éxito dos nosos infantes da mariña. E aqui preséntase o primeiro lío porque xulgalos en España trae un risco enorme e porque os seus compatriotas teñen apresados a 36 mariñeiros nun atuneiro. Pero a lei é a lei, e Garzón and company deciden traelos ó mesmo tempo que os secuestradores comezan a reclamalos, ameazando con non liberar ó barco español.

Segundo problema, un forense advirte que un dos detidos é menor de idade e un dos xuíces toma a decisión de encomendalo a Fiscalía de Menores de Madrid, saltando o protocolo normal nestes casos, que sería o Xulgado de Menores da Audiencia Nacional. Días máis tarde, unha nova proba di que o rapaz é maior de 18 anos, demostrando que non había órgano xurisdiccional que se encargue del... E volta a comezar. E isto pasa no século XXI.

E agora, séguese o curso xudicial iniciado ou cabe algún xesto esixido como condición dos secuestradores?. Aqui Moratinos ten un grave problema, porque unha vez xudicializado un caso, non hai quen o pare e non hai un só maxistrado neste país que faga un favor neste tipo de canxes.

O desenlace, aínda descoñecido por todos, esperemos que non se alongue moito e teña un final feliz porque non me gustaría estar no pelexo dos 36 mariñeiros ou no das súas angustiadas familias.