#EuApoioAosRiazorBlues

As redes enchéronse este xoves co hashatg #EuApoioAosRiazorBlues tras coñecerse que o Dépor será multado “por favorecer al grupo radical y violento” Riazor Blues. En concreto, o RC Deportivo foi multado por permitir no estadio municipal unha pancarta co nome dos Riazor Blues (10.000 euros) e por terlles facilitado as entradas para o derbi da pasada tempada (2 de abril) co Celta en Balaídos. En total, 20.000 euros, ademáis de novas propostas de sancións.

De @Arredeeemo, avogado laboralista e responsábel do BNG na Coruña, foi o primeiro chío: “Fronte a un goberno que ampara aos verdadeiros criminais e que multa ao @RCDeportivo por permitir a faixa dos RB #EuApoioAosRiazorBlues”. E o chío da Federación de Peñas Deportivista (@pdeportivistas) foi o que tivo máis repercusión (ata 152 rechíos): “Pasado, presente e futuro da historia do @RCDeportivo que entre tod@s imos defender. #EuApoioAosRiazorBlues”. Así ata converterse en tendencia en twitter en toda España, e con algúns chíos facenco comparacións entre a sanción de 10.000 euros por permitir unha pancarta dos Riazor Blues e os 1.500 recibidos polo Valencia polo botellazo a Neymar.

A pancarta que motivou a sanción foi exhibida o 14 de maio no partido contra o Real Madrid no fondo habitual dos Riazor Blues (hai propostas de sancións da Comisión Antiviolencia pola mesma pancarta esta tempada). Outros 10.000 euros de sanción son por ter facilitado a venda de entradas e o desprazamento ata Vigo dos Riazor Blues en abril do ano pasado. A resposta do RC Deportivo é sempre a mesma: que non considera aos Riazor Blues como grupo violento e que xa está inscrito no rexistro oficial de seareiros do club, pero nada se sabe dos recursos presentados polo club presidido por Tino Fernández.