Galicia non consegue reducir o número de familias e empresas en quebra

As familias e empresas que se declararon en concurso de acredores (suspensión de pagamentos e quebras) ante a imposibilidade de afrontar os seus pagamentos e débedas en Galicia foron un total de 58 durante o terceiro trimestre deste ano, o que supón a mesma cifra que no mesmo período de 2015. Deste xeito, Galicia é unha das seis autonomías nas que non descenderon os concursos, mentres a media estatal diminúe un 17,4%, segundo a Estatística de Procedemento Concursal do Instituto Nacional de Estatística (INE) publicada este luns. Con todo, non aumenta o número de debedores concursados en Galicia, tal e como aconteceu no segundo trimestre deste ano de forma interanual.

O maior aumento prodúcese en Aragón (+15,2%), seguida de Castilla e León (+13%), Madrid (+6,1%), Castilla-La Mancha (3,7%) e La Rioja, ao igual que a Comunidade galega, se mantén invariable. No outro extremo, a maior caída interanual prodúcese en Asturias ( -83%).

TIPOLOXÍA

Por tipo de concurso, a maioría (52 de 58) só seis foron de carácter voluntario en Galicia. Por clase de procedemento, 54 seguiron o abreviado e catro o ordinario. En todos os casos houbo existencia de proposta anticipada.

En canto á natureza xurídica, 12 persoas físicas sen actividade empresarial entraron en quebra, fronte a un total de 46 empresas —34 sociedades de responsabilidade limitada, seis sociedades anónimas, tres persoas físicas ou outras tres doutro tipo—.

Por actividade económica en Galicia, desas 46 sinaturas en quebra, o grupo ao que corresponde unha cifra maior é o comercio ao por maior (12), seguido da construción (11), industria (6), hostalaría (3), actividades profesionais (3), inmobiliarias financeiras (1), transporte (1). Tamén tres en resto de servizos e seis en tipoloxía sen clasificar.

Respecto ao tramo de asalariados, 11 das 46 empresas quebradas tiñan un ou dous empregados. Oito delas sen ningún asalariado e oito tamén entre tres e cinco. O resto de sinaturas tiñan máis de cinco empregados.

DATOS ESTATAIS

En España, as familias e empresas que se declararon en concurso de acredores (suspensión de pagamentos e quebras) ante a imposibilidade de afrontar os seus pagamentos e débedas baixaron un 17,4% no terceiro trimestre do ano en relación ao mesmo período de 2015, ata sumar 995, segundo a Estatística de Procedemento Concursal do Instituto Nacional de Estatística (INE) publicada este luns.

En concreto, as familias que se declararon en concurso de acredores ascenderon a 130, o que supón un descenso do 3% respecto ao mesmo trimestre de 2015, mentres que as empresas concursadas baixaron un 19,2%, ata sumar 865 procedementos de quebra.