Son a ciencia e a relixión compatibles?
Iso é o que tentará explicar o profesor emérito Carlos Pajares que disertará sobre estas temáticas nun encontro da Conferencia Episcopal.
Por Galicia Confidencial | Compostela | 10/11/2016 | Actualizada ás 10:00
Ciencia e relixión son compatibles?. Durante anos, moitos científicos e matemáticos foron perseguidos pola Inquisición polas súas investigacións. Pero eses tempos son xa auga pasada. Precisamente, unha conferencia sobre a relación entre ciencia e relixión do profesor emérito e ex rector da USC, Carlos Pajares, abrirá este xoves a trixésimo primeira edición do Encontro de Delegados Diocesanos e Responsables de Pastoral Universitaria que organiza a Conferencia Episcopal en Málaga co lema ‘O diálogo, clave para construír a universidade’.
Pajares presentará unha intervención articulada en cinco bloques temáticos e cuxo relato comeza coas teorías de Galileo e Darwin e a correspondente confrontación entre ciencia e relixión e continúa coa referencia ao principio antrópico. “Somos moitos os escépticos que pensamos que a crenza na existencia de deus non será nunha unha verdade científica suxeita a aprobación ou a desaprobación por razóns estritamente científicas”, sinala Pajares. Unha posición que o profesor emérito considera “non contraditoria con que se pense que a orde intelixible e fermosa do universo, tan chamativo para os científicos, sexa un reflexo do seu creador, incluíndo o marabilloso axuste fino, sexa explicado ou non pola ciencia”.
Busca da verdade
A conferencia do profesor Pajares, segundo apunta a USC, tentará achegar unha resposta que reflexione sobre por que o universo é comprensible. Partindo da idea de que “a ciencia non pode proporcionarnos respostas ao que o filósofo da ciencia Karl Popper chamou preguntas fundamentais”, o profesor Pajares afirma que “a ciencia obtén os seus maiores éxitos pola modestia da súa ambición, autolimitándose e restrinxíndose a si mesma, a buscar e responder a preguntas concretas e específicas concernentes a procesos susceptibles de verificar”.
Un dos puntos centrais da súa conferencia será o relativo aos puntos de encontro entre ciencia e relixión, caracterizadas en opinión de Pajares pola “busca de unicidade e simplicidade como reflexo da verdade e da beleza”. Carlos Pajares concluirá a súa intervención aludindo á relación entre creación e revelación.
