O emprendemento crece en Galicia en 2015, pero soben os que montan un negocio por necesidade ao maior nivel en 10 anos

A Comunidade galega reduce a súa brecha con España en taxa emprendedora, pero segue debaixo da media

Santiago de Compostela | 02/12/2016 | Actualizada ás 13:26 por EUROPA PRESS

Comparte esta noticia

A taxa de actividade emprendedora creceu en Galicia en 2015 ata o 5,51% -representa a porcentaxe de poboación adulta en proxectos de menos de 42 meses de actividade-, fronte ao 3,91% que supoñía en 2014, segundo o segundo o informe Global Entrepreneurship Monitor (GEM).

Galicia reduce así a súa brecha no impulso de novos proxectos emprendedores respecto a España, xa que en 2014 había unha diferenza de 1,55 puntos e en 2015 queda en 0,19 puntos, pero o 5,51% galego continúa por debaixo da media estatal (5,7%), segundo figura no informe que presentou este venres en Santiago a directora-técnica de GEM-Galicia, Isabel Neira.

Deste modo, a Comunidade galega rompe en 2015 co período de decrecemento entre 2012 e 2014, nunha tendencia motivada polo auxe de novas iniciativas empresariais entre os tres e os 42 meses de actividade.

Con todo, no informe figura que entre estes novos emprendedores aumentan os que montan un negocio por necesidade e falta de alternativas de emprego ata un 43,5% do total en 2015, cando supoñían o 37% en 2014. Ademais, trátase da taxa máis alta na última década -entre 2005 e 2015-, período histórico no que se realizou este estudio.

Non obstante, baixan os que o fan por oportunidade de negocio ou outros motivos ata un 56,49% en 2015, cando en 2014 eran un 57,85% do total.

SECTORES E AUMENTO DE ABANDONO

O único dos sectores que aumenta en 2015 é da transformación (25,34% do total), mentres baixan os negocios orientados ao consumo (44,74%), os servizos a empresas (21,88%) e o sector extractivo (8,04%).

Xunto a isto, detéctase que en 2015 se incrementa a percepción de oportunidades para a creación de empresas ata se situar nun 34,77% -era do 26,44% en 2014-, se ben tamén sobe o temor ao fracaso ao 43,7%, cando un ano antes solo representaba o 36%.

Ademais, a taxa de abandono en Galicia das iniciativas emprendedoras sobe do 1,85% ao 2,34% en 2015, en contraposición ao descenso a nivel estatal. As causas máis destacadas para deixar a actividade son, por orde, unha rendibilidade insuficiente, motivacións persoais e a xubilación. No outro extremo, a iniciativas consolidadas teñen unha taxa na Comunidade galega por enriba da media española.

RADIOGRAFÍA DO EMPRENDEDOR GALEGO

Segundo este estudio, a idade media do emprendedor galego vai á alza, ata situarse por enriba dos 40 anos, pois só o 21% ten entre 25 e 34 anos.

A maioría son microempresas sen empregados e un solo propietario, e defínense como non innovadoras (un 80% do total). Non obstante, o 64,4% espera incrementar os seus equipos. Un 63% afirma ter formación específica para emprender e o 68,6% non exporta.

Aínda que hai un incremento da actividade emprendedora da muller galega, prodúcese un descenso entre 2014 e 2015 da proporción de mulleres respecto aos homes en todas as fases do proceso, salvo no emprendimiento consolidado.

"BOS" RESULTADOS

Á presentación deste informe celebrada en Santiago acudiu o reitor da USC, Juan Viaño, que considera que os de 2015 son uns "moi bos" resultados no emprendimiento galego.

Ao respecto, sinala que o 29% dos universitarios teñen intención de emprender, o 7,5% xa participaron nunha empresa e o 5% crearon a súa propia.

Sobre este extremo, o secretario xeral de Universidades, José Alberto Díaz de Castro, resaltou que se percibe unha actividade emprendedora "moi superior" entre aqueles con estudios universitarios fronte aos que non os teñen.

Pola súa banda, o responsable do Instituto Galego de Promoción Económica (Igape), Javier Aguilera, puxo en valor estes "datos positivos" de aumento da actividade emprendedora, tras "seis ou sete anos onde todo era negativo".

Algún erro? Nota editorial
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta