O legado de Díaz Pardo tamén morre en Ferrol
Mobilizacións en Ferrol en contra do peche da Galería Sargadelos. Entidades sociais pídenlle á empresa “unha reflexión e rectificación” para que a galería continúe a súa actividade cultural nesta cidade.
Por Galicia Confidencial | Ferrol | 19/12/2016 | Actualizada ás 09:15
A Galería Sargadelos desaparecerá de Ferrol. Iso é, cando menos, o que lle transmitiu xa a empresa aos seus traballadores. Un anuncio que non caeu nada ben entre parte do tecido asociativo e cultural da cidade departamental que xa anunciou mobilizacións.
Así, este luns, ás 19.30 horas terá lugar unha concentración convocada pola AVV O Rosario Inferniño que lembra que “o legado cultural do galeguista Isaac Díaz Pardo nesta galería representa algo máis cunha simple empresa comercial”.
De feito, neste céntrico local teñen lugar, habitualmente, reunións e actividades de determinadas asociacións “co obxecto de reivindicar a cultura e reivindicacións sociais”. Por iso, esta entidade pídelle ao goberno local, á Xunta e a entidades políticas e sociais a súa intervención “co fin de evitar este peche”. Tamén lle reclaman á empresa “unha reflexión e rectificación” para que a galería continúe a súa actividade cultural en Ferrol.
