Galicia, segunda autonomía con máis afogados en espazos acuáticos en 2016 con 69 vítimas

Un total de 69 persoas faleceron por afogamento en espazos acuáticos de Galicia ao longo do ano 2016, o que supón 28 máis que o exercicio anterior, o que a sitúa como a segunda comunidade autónoma con máis vítimas, segundo o balance do 'Informe Nacional de Ahogamientos' que elabora a Real Federación Española de Salvamento y Socorrismo.

O perfil da vítima mortal é un home (80% dos casos), de nacionalidade española (70%), maior de 45 anos (61,2%), que perde a vida nunha praia (51,7%) que non ten vixilancia (86%) entre as 10.00 e as 18.00 horas (56,5%).

Só catro meses rexistraron menos falecidos en 2016 que o ano anterior, aínda que con baixadas moi pronunciadas en xullo, con trinta menos, e outubro, cun descenso de vinte e catro óbitos, xunto a agosto, onde houbo dez menos, e setembro, cunha baixada de once.

O aumento de falecementos no conxunto do ano tivo lugar malia o acentuado descenso que se deu nos dous principais meses de uso dos espazos acuáticos, xullo e agosto, nos que as mortes diminuíron en case o 26 por cento, ao baixar a 115 en 2016 fronte ás 155 que se produciron o ano anterior.

Nos outros oito meses do ano houbo máis vítimas mortais que na anualidade precedente, con especial significación en maio, onde se deron 29 falecidos máis, e xaneiro, con 20. En xuño houbo 13 mortos máis, dez en febreiro e abril, nove en decembro, catro en novembro e dous en marzo.

COMUNIDADES AUTÓNOMAS

Por territorios, Canarias foi a Comunidade Autónoma onde máis afogamentos no medio acuático se deron, con 71 casos, seguida de Galicia (69), Andalucía (66) Comunidade Valenciana (47), Illas Baleares (37), Castela e León (31), Cataluña (30), País Vasco (18), Aragón (12) e Rexión de Murcia (11).

Con menos de dez falecementos atópanse Asturias, onde houbo nove, Castela-A Mancha (8), Estremadura (7), Cantabria (6), Ceuta e Melilla, con catro en cada Cidade Autónoma, Comunidade de Madrid (3) e A Rioxa e Navarra, con dous en cada territorio.

Respecto á anualidade anterior, o número de mortes aumentou en nove territorios, que son Galicia, con 28 falecidos máis, Castela e León, con 22, País Vasco (10), Canarias (9), Comunidade Valenciana (8), Illas Baleares e Melilla (3 en cada caso) e Asturias (1).

Pola contra, Cataluña, con 27 falecidos menos, é a comunidade autónoma onde o descenso de falecementos foi máis acentuado, por diante de Ceuta e Rexión de Murcia, con oito en cada territorio, Cantabria (7), Navarra (4), Comunidade de Madrid, (3), Andalucía e Castela-A Mancha, con dous en cada rexión, e Estremadura, cun, mentres que non se rexistraron variación entre o 2016 e 2015 en Aragón e A Rioxa.