Por Galicia Confidencial | Santiago de Compostela | 17/01/2017 | Actualizada ás 11:52
Varias asociacións ecoloxistas critican o borrador de Directrices da Paisaxe de Galicia . A Asociación ambiental e cultural Petón do Lobo, a Asociación galega Cova Crea e a Asociación ambiental Amigos e Amigas dos Bosques “O Ouriol do Anllóns” alertan que a norma “vende as Áreas de Especial Interés Paisaxístico de Galicia á Cámara Mineira de Galicia e ás empresas do sector mineiro”.
Na súa opinión, se saen adiante estas directrices, será posíbel a instalación de minas a ceo aberto en paisaxes protexidas. Unha cuestión importante, dado o elevado número de concesións mineiras que hai no país. Na provincia de A Coruña hai 370 dereitos mineiros solicitados, 449 en Lugo, 474 en Ourense e 422 en Pontevedra.
O debate sobre as directrices segue en marcha
“A meirande parte da cidadanía galega descoñece que o subsolo da súa casa tal vez podería estar xa adxudicado a unha empresa para a investigación mineira ou explotación”, alertan as citadas asociacións. Os colectivos lembran que a maioría destes permisos foron concedidos a empresas foráneas, como sucede, por exemplo, no paralizado proxecto de Corcoesto.
A Xunta abriu ao público o debate sobre as directrices. Con todo, segundo os denunciantes, non tivo en conta as aportacións. Ante esta situación, indican que están disposto a chegar a denunciar o regulamento definitivo diante da Xustiza. Na “fraude” do borrador, en opinión dos ecoloxistas, prevalece os dereitos mineiros sobre a protección da natureza e da saúde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.