Por E.P. | SANTIAGO DE COMPOSTELA | 20/01/2017 | Actualizada ás 18:21
A Plataforma en Defensa do Ensino Público mantivo unha reunión este venres na que se estudou a posibilidade de convocar unha folga para o próximo mes de marzo ante a falta de "avances" na axenda educativa para a elaboración dunha nova lei de Educación que substitúa a LOMCE, paralizada polo Congreso.
Así mesmo, a través dun comunicado, a plataforma —integrada pola Confederación Galega de Anpas de Centros Públicos (Confapa), Sindicato de Estudantes, Iesga, CC.OO -Ensino e Escola Viva— critica a decisión do Consello de Ministros de "acudir ao Tribunal Constitucional para intentar anular o acordo do Congreso" que "impulsa" a paralización da LOMCE.
E é que a plataforma ve neste movemento por parte do Goberno central un "desprezo pola sede da soberanía nacional", ao tempo que denuncia a "falta de actividade" da subcomisión Parlamentaria para o Pacto Educativo, que foi constituída en decembro e que "aínda non comezou" a súa actividade malia que ten "seis meses" de vixencia.
Deste modo, acusan o Goberno central de ter "pouco interese en avanzar na axenda educativa" para desenvolver unha nova lei, xa que cren que a súa "intención" é conseguir un "pacto exclusivamente político de costas á comunidade educativa".
FOLGA O 9 DE MARZO
"Non imos consentir que se exclúa do pacto ás organizacións sociais representativas dos distintos sectores da comunidade educativa", manifestan dende a plataforma, que reclama "un amplo consenso tanto político como social para desenvolver unha nova lei educativa.
Así a cosas, aseguran que, unha vez pase "este período deliberativo", a plataforma convocaría unha folga xeral na Educación o próximo 9 de marzo na que buscarían a implicación de "toda a comunidade educativa galega", dende "infantil ata a universidade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.