Por Galicia Confidencial | Santiago de Compostela | 02/02/2017 | Actualizada ás 10:46
O Instituto Tecnolóxico e de Estudos Superiores de Monterrey (TEC), en México, considerada a sétima universidade máis importante de Latinoamérica e a mellor do país azteca, convidou ao xornalista e escritor galego Manuel Guisande a impartir un curso de escritura creativa e levar a cabo diversos proxectos artísticos con estudantes deste centro académico.
O convite chega logo de que a directora do Departamento de Comunicación e Xornalismo do centro universitario, Ana Cecilia Torres, lese varios libros de Guisande que espertaron o seu interese e que a animaron a trasladar á dirección do TEC a proposta de convidar ao autor galego a impartir aos alumnos de Literatura e Arte Dramático os seus coñecementos en Xornalismo e escritura de relatos, contos e guións de radio e teatro. Será durante tres semanas, entre o 7 e o 21 de febreiro.
Guisande será ademais recibido polo cónsul de España en Monterrey, Francisco Capote Yeregui, co que manterá unha charla informal sobre as relacións culturais entre España e México, e pronunciará unha conferencia na Casa de España en Monterrey, que preside José María Benarroch.
Guisande sinalou que lle sorprendeu o convite: "Causoume unha gran ilusión, non soamente porque México é un país moi atractivo, senón polas facilidades que me deron para levar a cabo diversas propostas creativas, o que desgraciadamente non me ocorreu en Galicia", expresou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.