Camiñamos cara produtos e modelos de negocio con vidas máis curtas
A robótica, o Big Data e os valores das xeracións máis novas crean novos modelos de negocio aos que as empresas galegas deben adaptarse máis rápidamente, segundo explican os economistas Fernando de Trías e Andrés Riveiro. A capacidade para adaptarse ás novas xeracións e a automatización do traballo, clave para a competitividade.
Por GC Emprende | Vigo | 28/03/2017 | Actualizada ás 18:05
Seresco e a Asociación para o Progreso da Dirección (APD) celebraron, en senllos actos na Coruña e Vigo, a xornada “A nova cadea de valor: modelos de negocio para unha nova realidade social, económica e tecnolóxica”. A sesión, enmarcada no ciclo “Empresa e Transformación Dixital” da APD, contou coa participación do escritor e economista Fernando Trías de Bes. Aos actos acudiron máis de 100 empresarios da rexión.
Santiago Sesto, director da zona noroeste da ADP, foi o encargado de abrir a xornada. Pola súa banda, Andrés Riveiro, director de Seresco en Galicia, sinalou que é esencial “sentar sólidas bases para que as empresas galegas poden abordar a transformación dixital de maneira exitosa. A evolución de novos modelos de negocio baseados nas posibilidades que ofrecen as contornas dixitais avanza a gran velocidade, polo que é necesario reaccionar con rapidez, pero sen obviar aspectos básicos, como o impulso aos sistemas de xestión integrados”.
Entre os aspectos prácticos e básicos que as pemes galegas deben incorporar para a transformación dixital dos seus negocios, Riveiro destaca que é esencial prestar atención ao novo contexto económico e social. O aumento da esperanza de vida, a redución do volume de traballo grazas á tecnoloxía (especialmente, a robótica), o Big Data, unha contorna dixital cada vez máis saturada de contidos, a economía colaborativa e os valores das novas xeracións (millennials, Xeración E, Xeración Z), impulsan modelos de negocio disruptivos e cuestionan a sustentabilidade do estado do benestar.
Ante estes modelos de negocio, sinala Riveiro, as empresas galegas deben adaptarse preguntándose como capturar valor, cuestionando os fluxos de procesos e a súa arquitectura interna, a lóxica do negocio (por que funciona e que consecuencias ten este funcionamento), todo iso sen descoidar a monetización da súa actividade.
Finalmente interveu Trías de Bes, quen acaba de publicar o libro “Seres excepcionais”. A investigación de Trías de Bes, economista e MBA por ESADE e The University of Michigan, centrada en innovación disruptiva, sitúano como un dos referentes en España nas materias relacionadas coa xestión das organizacións.
En opinión do economista, non soamente estase acurtando o ciclo de vida dos produtos, senón tamén dos modelos de negocio e organizativos. Por iso, as empresas han de desenvolver novas vantaxes, especialmente, enfocándose no "como" en lugar do "que".
