Música e gastronomía como industria creativa, na ICC Week

Marta Gómez -xornalista cultural-, Migui Puig -músico, compositor e cantante-, Daniel Sanchís -Brand Activation Director en M&C Saatchi-, Almudena Palacios -coordinadora de ¡Queremos entrar!- e Patricia Hermida -manager e presidenta de MMF Spain- foron os protagonistas da segunda sesión do ICC Week. Unha sesión na que se abordou a rapidez coa que cambia a industria musical, tomando como exemplo que "o ano pasado foi a primeira vez que en España as vendas dixitais superaron ás vendas físicas”. 

A falta de liberdade para escoller a entidade de xestión das creacións dunha persoa en Europa, a reconversión de empresas para poder sobrevivir na industria ou as condicións laborais dos artistas no sector foron os eixos principais sobre os que xirou o debate.

Xa durante a xornada da tarde e ao remate da masterclass impartida por Javier Olivares -un dos creadores da serie El Ministerio del Tiempo-, chegou a quenda de poñer a gastronomía en valor como industria creativa. Os encargados foron Alfonso López -redactor do blogue de cociña recetasderechupete.com-, Pepe Solla -chef de Casa Solla-, Javier Olleros -chef do restaurante Culler de Pau-, Mònica Escudero -redactora xefa de El Comidista- e o chef do Restaurante Nova de Ourense Daniel Guzmán.

No acto, que se celebrou no Centro Cultural Marcos Valcárcel da Deputación de Ourense e congregou a máis dun centenar de persoas, estas cinco personalidades da cociña achegaron esta arte ao público analizándoa en base a diversos temas de actualidade: a función da xente nova no sector gastronómico, os "dereitos de autor" nos pratos ou a posibilidade de combinar creatividade con excelencia.

Como broche final para este segundo día de ICC Week, a banda tributo The Funkles ofreceu un concerto nos Xardíns do Padre Feijoo onde os asistentes gozaron das mellores versións de The Beattles.