Nova protesta en Santiago contra o desaloxo do local okupado e a actuación policial
A manifestación percorreu sen incidentes as rúas de Santiago baixo a pancarta 'O sistema, a Policía e La Rosaleda nom vam poder connosco. Apoia os centros sociais, apoia o Escarnio e Maldizer'.
Por E.P. | SANTIAGO DE COMPOSTELA | 31/05/2017 | Actualizada ás 23:13
Unhas 400 persoas participaron este mércores en Santiago nunha nova manifestación que percorreu as rúas da capital galega un día despois do polémico desaloxo dun local okupado como centro social e dunha concentración posterior marcada polos disturbios, que se saldou con varias cargas policiais e axentes feridos.
Este mércores, ao redor das 21,00 horas, arrincou a protesta, encabezada por unha pancarta coa lema 'O sistema, a Policía e La Rosaleda nom vam poder connosco. Apoia os centros sociais, apoia o Escarnio e Maldizer'. E o certo é que, precisamente, a construtora compostelá La Rosaleda está ligada á propiedade do inmoble desaloxado na pasada xornada.
No medio dunha significativa vixilancia policial e cunha decena de furgóns pechando a marcha, os manifestantes saíron da Praza de Galicia e avanzou por Virxe da Cerca cara aos barrios composteláns de San Pedro e Concheiros.
En Rodríguez de Viguri está, precisamente, a sede da construtora La Rosaleda, que vixiaban axentes policiais.
MOMENTOS DE TENSIÓN
Na zona da estación de autobuses houbo algún momento de tensión, pero non foi a máis e, aínda que houbo proclamas contra a actuación policial, os manifestantes continuaron o seu percorrido de forma pacífica. "As nosas mans, as nosas armas", proclamaban.
Con todo, púidose ver como algúns tiraban unhas pedras sen chegar a romper un escaparate, aínda que foron increpados polos seus propios compañeiros de protesta.
Así, tras avanzar por San Caetano e Pastoriza, os manifestantes pasaron á zona vella percorrendo San Roque e a Algalia ata acabar en Cervantes, onde unha portavoz agradeceu as mostras de apoio recibidas tras os altercados da pasada xornada.
A mesma portavoz destacou que a importante participación na protesta deste mércores evidencia o apoio ao traballo e ás actividades realizadas no local desaloxado nos últimos anos.
NOVA PROTESTA O SÁBADO
Tamén avanzaron que este sábado se convocará unha nova manifestación da que informarán a través das redes sociais.
No percorrido, os manifestantes entoaron varios cánticos e proclamas como "A loita é o único camiño!" ou "Eu tamén son de Escarnio e Maldizer", ademais de reivindicar o papel dos centros sociais e reprobar a actuación policial.
