Protesta laboral contra Inditex na Coruña
A Coruña acolleu unha protesta laboral contra Inditex este xoves. En concreto, contra o peche dunha "histórica" tenda de Stradivarius en Catro Camiños. A protesta desenvolveuse coincidindo coa re-inauguración doutra tenda de Stradivarius da Praza de Lugo, tras ser reformada.
Por Galicia Confidencial | A Coruña | 01/09/2017 | Actualizada ás 18:00
Aínda que a empresa prometeu que as operarias ían ser recolocadas noutros comercios da urbe, a CIG denuncia que perderán poder adquisitivo ao ter que compartir complementos con máis compañeiras. As traballadoras irán ao Centro Comercial Marineda e a citada Praza de Lugo, onde tivo lugar a concentración o xoves pola mañá.
"Dende o primeiro momento, manifestamos a nosa rotunda oposición ao peche da tenda histórica do C.C. Catro Camiños, que, día tras día, supera os obxectivos de venda marcados. Porén, a empresa remarcou que era unha decisión comercial irrevogábel", argumentou Lucía Domínguez, presidenta do comité na provincia da Coruña. Na protesta tamén participou Paulo Carril, o novo líder da CIG.
Estímase que hai unhas 20 persoas afectadas polo traslado. GC púxose en contacto con Inditex para explicar o seu punto de vista do conflito, pero polo de agora non recibiu resposta.
