Por Xurxo Salgado | Compostela | 29/09/2017 | Actualizada ás 13:30
Galicia só acolleu ao 13% dos 1.7000 refuxiados que se comprometera a acoller en 2015 e que deberían estar xa en distintos concellos do País desde o pasado martes, que é cando venceu a data límite dada pola UE. Pero, o presidente galego, Alberto Núñez Feijóo, semella que está máis preocupado polo que acontece en Venezuela.
GC preguntoulle este xoves, na rolda de prensa posterior ao Consello da Xunta, polo incumplimento deste acordo europeo de recollida de refuxiados --que tamén incumpliu o coxunto do Estado español--. "Nós imos dar refuxio a todas as persoas que o Goberno central nos pida que deamos refuxio. Temos recursos, infraestruturas e músculo financeiro para facelo", dixo.
Feijóo insistiu, en todo caso, que o dato de acollidos en Galicia é superior en porcentaxe ao conxunto da media española e recalcou que o seu goberno "está a disposición deses refuxiados". Con todo, dixo tamén estar moi preocupado pola situación dos venezolanos ou galego-venezolanos.
"Tamén nos preocupa o éxodo de galegos-venezolanos que está habendo", dixo. De feito, foi máis alá e fixo unha oferta a todos aos que queiran saír do país caribeño para que veñan a Galicia. "Mandamos unha mensaxe a todos os venezolanos que están en situación límite de que Galicia é un bo lugar de acollida, un bo lugar para vivir e para estudar os seus fillos e nós intentamos axudar a todos os venezolanos que están perseguidos por razóns ideolóxicas que poidan vir a Galicia a vivir e instalarse", dixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.