O PP quere obrigar ao resto dos grupos a que apoien o discurso de Felipe VI
Tamén pide que se respalde a actividade da Garda Civil e da Policía Nacional en Cataluña. En Marea e BNG piden cambiar o actual marco de relación entre Galicia e o Estado pero, ao igual que o PSdeG, centran as súas propostas en mellorar a situación económica e social dos galegos.
Por Galicia Confidencial | Compostela | 05/10/2017 | Actualizada ás 14:43
Os populares están dispostos a converter o caso catalán nunha nova baza electoral en Galicia. Logo da intervención de Feijóo duranta o discurso do estado do país, centrado principalmente en Cataluña, o PP pide que o Parlamento de Galicia exprese a súa adhesión ao contido do discurso do Felipe VI, ante o conflito catalán e tamén que manifeste "a súa solidariedade e respaldo á Policía Nacional e á Garda Civil no seu labor de defensa e protección dos dereitos e liberdades amparados pola Constitución a todos os cidadáns".
Estas son algunhas das 40 propostas de resolución que rexistraron no marco do primeiro Debate sobre o Estado da Autonomía da X Lexislatura e inciden en que a Cámara galega debe "condenar o acoso que sofren" os membros das forzas de seguridade desprazados a Cataluña, entre os que se atopan galegos, por "defender o Estado de Dereito e salvagardar a convivencia, a seguridade e a tranquilidade da cidadanía".
Con todo, e a pesar da insistencia no tema catalán, o viceportavoz parlamentario, Miguel Tellado, rexeitou unha instrumentalización da figura do xefe do Estado con propostas deste tipo e subliñou que a oposición debe "aclarar onde está".
Novo marco político para Galicia
Pola súa banda, os grupos da oposición incidiron na necesidade de cambiar o actual marco de relación entre Galicia e o Estado español e superar o actual Estatuto de Autonomía. Así, En Marea pediu o recoñecemento do dereito a decidir dos pobos por parte do Parlamento, a loita contra a precariedade laboral e contra a violencia de xénero ou a posta en marcha dunha estratexia que permita a Galicia crear "máis e mellor" emprego, son algunhas das 40 propostas de resolución que En Marea levará ao Debate sobre o Estado de Autonomía.
Estas medidas foron presentadas polo viceportavoz parlamentario do partido instrumental, Antón Sánchez este xoves nunha rolda de prensa na que asegurou que, con estas medidas, En Marea busca "dar unha solución aos miles de persoas que non poden ter unha vida digna polas políticas" do Partido Popular.
Pola súa banda, o BNG propuxo a posta en marcha dun relatorio para "superar" o actual marco estatutario e "adaptalo á Galicia do século XXI", blindar servizos públicos con medidas como o compromiso de destinar o 7% do PIB a garantir o ensino público, así como recuperar o consenso político sobre o galego "garantindo e respectando" os dereitos lingüísticos do pobo.
Entre outras cuestións, o Bloque tamén defenderá a despatoloxización da transexualidade a través dunha lei galega de identidade de xénero, a retirada das reformas laborais, así como a posta en marcha dunha comisión de investigación sobre o accidente de Angrois.
Medidas económicas
Pola súa banda, a recuperación económica, a modernización de Galicia, a mellora do autogoberno e a mellora dos servizos públicos centran as 40 propostas de resolución que o PSdeG presentou para o Debate sobre o Estado da Autonomía.
Entre outras medidas, os socialistas urxen a cobertura de todos os dependentes en listas de espera, reclaman un novo decreto que regule o uso do galego na educación, demandan reformar o Estatuto de Autonomía, expoñen iniciativas en materia de industria e abren novas vías para reclamar o traspaso da AP-9.
