Madrid envía axuda humanitaria e veterinaria a Ponte Caldelas
Chega nun camión fretado por cinco mozos.O concello clasifica agora o "inxente" material recadado, enre o que se atopa roupa, comida ou medicamentos.
Por E.P. | SANTIAGO DE COMPOSTELA | 21/10/2017 | Actualizada ás 21:02
Cinco mozos madrileños --de entre 24 e 28 anos-- viaxaron ata Ponte Caldelas (Pontevedra) cun camión cargado de axuda humanitaria e veterinaria tras os incendios que afectaron a este municipio.
Segundo informa o Concello nun comunicado, Belén Merino iniciou unha campaña para levar axuda a Galicia e acabou fretando un camión --cedido por unha empresa de transportes-- con 14 palés con roupa, comida, medicamentos, material sanitario, así como diversos produtos para animais.
Para iso, comezou recadando material polo seu barrio e acabou conseguindo axuda por todo Madrid, especialmente de tendas de animais e persoal dun hospital. Así, conformou un grupo de voluntarios xunto a Dani Paunero, Álvaro de Almagro, Samuel García e Ana Belén Mirasierra.
O Concello de Ponte Caldelas clasifica agora o "inxente" material recadado, e convida os veciños que necesiten medicamentos ou alimentos tanto para eles como para os seus animais a que pregunten na Casa Consistorial. O excedente será doado a ONG e protectoras de animais.
Pola súa banda, diversas asociacións culturais, de veciños e de comunidades de montes de Ponte Caldelas crearon unha comisión organizadora de actividades solidarias en favor dos afectados polos incendios.
