O Concello de Ponte Caldelas considera un “espolio” o transvasamento de auga do Verdugo a Eiras
Convoca unha manifestación para o domingo 3 de decembro para mostrar o seu rexeitamento á obra hidráulica prevista para paliar as consecuencias da seca.
Por E.P. | VIGO | 29/11/2017 | Actualizada ás 20:12
O Concello de Ponte Caldelas convocou unha manifestación para o domingo 3 de decembro, ás 12.00 horas na Alameda, co lema 'Non ao espolio do río Verdugo. Transvasamento non, natureza si', para mostrar o seu rexeitamento á obra hidráulica prevista para bombear auga desde ese río até o encoro de Eiras, nunha actuación de emerxencia para paliar as consecuencias da seca.
Este municipio expresou o seu rexeitamento á realización desa obra polo impacto ecolóxico que terá no Verdugo e na súa contorna, e criticou que a Xunta non consultase ou informase a Ponte Caldelas sobre esta actuación.
Ademais, segundo precisou o alcalde desta localidade, o socialista Andrés Díaz, Ponte Caldelas é "solidaria" e entende a difícil situación de seca, por iso estaba disposta a colaborar na realización dunha obra provisional, non permanente, no río, aínda que noutro punto da canle (salto do Inferno).
Con todo, ante a evidencia de que a alternativa elixida pola Xunta, polo Concello de Vigo e polo resto de municipios que se abastecen de Eiras é outra, o goberno de Ponte Caldelas expresou o seu malestar e a súa oposición. "Non imos tolerar unha nova cacicada (...), o saqueo de recursos naturais debe cesar", proclamaron desde o consistorio.
Díaz criticou a actitude da Xunta e de Augas de Galicia que, mentres pon "incontables pegas" aos veciños para facilitarlles captacións de auga, si que "se dá présa" por extraer "até un terzo do caudal" do Verdugo nesa actuación, que cualifica como "unha animalada ambiental".
